दिपक बोहोरा

इलाम – अग्नी रुपन्देही ११ माइ भ्याली गोल्डकप फुटबल प्रतियोगिताको क्वार्टरफाइनलमा पुगेको छ । भारतको दुर्गापुर स्टिल टि.एस.वाइ , कोलकतालाई शुक्रबार टाईब्रेकर ४–२ ले हराउँदै रुपन्देही अन्तिम आठमा पुगेको हो ।

निर्धारित ९० मिनेटको खेल १-१को बराबरीमा टुंगिएको थियो भने थप १५ मिनेटमा पनि गोल हुन नसकेपछि खेलको निर्णय टाइब्रेकर बाट लिनुपरेको थियो।

खेलको २२औं  मिनेटमा गोल गर्दै सुरुवाती अग्रता लिएको भारतीय टोलीले लामो समय सम्म अग्रता जोगाउन सकेन। दुर्गापुरका बाबुलाल मण्डलले गोल गर्दै टिमलाइ अगाडी बढाएका थिए। दुर्गापुरका खेलाडीले डी बक्समा ह्याण्ड गरेपछि पाएको पेनाल्टीलाइ गोलमा परिणत गर्दै विजय धिमालले खेल बराबरीमा पुर्याएका थिए ।

पहिलो हाफ बराबरीमा सकिएपछि दोस्रो हाफमा दुवै टोलीबाट कुनै गोल हुन सकेन। आक्रामक रहदै दुवै टोलीले गोल गोल गर्ने प्रयास गरे पनि दोस्रो हाफको निर्धारित समयमा गोल नभएपछि खेलमा १५ मिनेटको समय थप गरीएको थियो । थपिएको समयमा पनि कुनै गोल हुन सकेन र खेलको निर्णय टाई ब्रेकर मार्फत निकालिएको थियो ।

टाईब्रेकरमा रुपन्देहिका निरज बस्नेत ,बिजय धिमाल, कालु थापा र लक्ष्मण रुचालले गोल गरेका थिए भने विदेशि खेलाडी आरोन डिमोडको प्रहार गोलरक्षकले बचाएका थिए । कोलकताका लागी सलमीरधा र ज्यायाक्सनले मात्र गोल गरे भने सलमुलेसको प्रहार बाहिरिएको थियो, त्यस्तै बिकास सिंहको प्रहार रुपन्देहीका कप्तान सोजित गुरुङले बचाएका थिए । पराजित टोलीका बाबुलाल मण्डल म्यान अफ दि म्याच घोषित भएका थिए। उनले नगद रु. ७ हजार प्राप्त गरे ।

रुपन्देहिका प्रशिक्षक दयाराम सापकोटाले राम्रा खेलाडी घाइते भएकाले राम्रो खेल्न नसकेको बताए । अर्को खेलमा सुधारिएको प्रदर्शन गर्नेमा विश्वस्त रहको उनले बताए। कोलकत्ताका प्रशिक्षक रहमतले भने रेफ्रीको गल्तीको कारण टिम पराजित हुन परेको गुनासो गरे ।

रुपन्देहीले क्वार्टरफाइनलमा रमपम झापा ११संग खेल्नेछ ।

शनिबारको खेल :

त्रिभुवन आर्मी क्लबविरुद्ध पश्चिम बंगाल टिम