काठमाडौं (हाम्रो खेलकुद)– लगनखेलको बुद्धि विकास मण्डलको मैदानमा जारी दोश्रो नेपाल कप भेट्रान फुटबल प्रतियोगितालाई कान्तिपथस्थित यल्लो प्यागोडा होटल मुख्य प्रायोजन गर्ने भएको छ । चैत १० गतेबाट सुरु भइसकेको प्रतियोगितालाई यल्लो प्यागोडाले प्रायोजन गरेसंगै प्रतियोगिताको नाम शशिकला स्मृति दोश्रो नेपाल कप भेट्रान फुटबल प्रतियोगिता हुनेछ ।

सम्झौता पत्र हस्ताक्षर कार्यक्रममा स्पोर्ट्स फर अल क्लब, नेपालका अध्यक्ष लोकबहादुर शाही र यल्लो प्यागोडाका अध्यक्ष दिलविकास राजभण्डारी (दायाँ) ।

प्रतियोगिता आयोजक स्पोर्ट्स फर अल क्लब, नेपालका अध्यक्ष लोकबहादुर शाही र यल्लो प्यागोडाका अध्यक्ष दिलविकास राजभण्डारीले प्रायोजन सम्बन्धी सम्झौता पत्रमा बिहीबार हस्ताक्षर गरे । स्व. शशिकला राजभण्डारीकी धर्मपत्नी हुन् । राजभण्डारीले प्रायोजन वापत दोश्रो संस्करणका लागि यल्लो प्यागोडाले आयोजकलाई २ लाख रुपैयाँ उपलब्ध गराउन जानकारी दिए ।

उनले आगामी दिनमा प्रतियोगिताको प्रगति हरेर सम्झौता अवधि र रकम पनि थप्दै जाने प्रतिबद्धता जनाए । शाहीले प्रतियोगितालाई अन्तर्राष्ट्रिय स्वरुप दिने प्रयास भइहरकेको बताउदै प्रायोजनले प्रतियोगितालाई अझ व्यापक बनाउन हौसला प्रदान गरेको बताए ।

सामाखुसी फाइनलमा
यसैबीच शशिकला स्मृति दोश्रो नेपाल कप भेट्रान फुटबल प्रतियोगितामा सामाखुसी फुटसल क्लब फाइनलमा पुगेको छ । लगनखेलस्थित बुद्धि विकास मण्डलको खेल मैदानमा बिहीबारको सेमिफाइनलमा सामाखुसीले ब्वाइज स्पोर्ट्स क्लब, काठमाडौंलाई २–० गोलअन्तरले हरायो ।

सामाखुसीका टासी छिरिङले ५७ औं र निमा लामाले ६५ औं मिनेटमा गोल गरे । फाइनलमा सामाखुसीले साइनिङ सन फुटबल एकेडेमी, कैलाली विरुद्ध शनिबार प्रतिस्पर्धा गर्नेछ । फाइनल त्रिपुरेश्वरस्थित दशरथ रंगशालामा हुनेछ ।