पोखरा १६ (हाम्रो खेलकुद) – पोखरा १७ दोभिल्लामा रहेको सहारा एकेडेमीलाई दिगो रुपमा संचालन गर्न पृथ्वीराजमार्ग बस संचालक समितिले नयाँ ढंगले सहयोग गर्ने भएको छ । समितिका अध्यक्ष ऐन कुमार साई सहिaतको समितिको पदाधिकारी टोलीले बुधबार एकेडेमीको अवलोकन गर्दै एकेडीमीलाई दिगो रुपमा संचालन गर्न नयाँ ढंगले सहयोग गर्ने भएको समितिका महासचिव योगेन्द्र केसीले बताए ।

सहारा क्लब स्थापना भएको २०५५ साल देखि समितिले सहयोग गर्दै आएको छ । आहा रारा गोल्ड कपको पछिल्लो तीन बर्ष देखि एक लाख ५० हजार बराबरको उत्कृष्ट पाँच विधामा पुरस्कार सहयोग गर्दै आएको अबस्थामा एकेडेमीलाइ समेत संचालन गर्न केहि सहयोग गर्ने समितिमा छलफल हुने केसीले जनाए ।

समितिले आफुमा आवद्ध बस पोखराबाट छुट्दा प्रति बस १० रुपैयाँ क्लबलाई सहयोग गर्दै आएको छ । स्थापना काल देखि क्लबलाई र पछिल्लो क्रममा आहा रारा गोल्ड कपलाई सहयोग गर्दै आएको र थप सहयोगका लागि एकेडमी भ्रमण गरेका अध्यक्ष साईले बताए । अध्यक्ष साईले भने ‘ सहारा एकेडेमीलाई पनि अब हामीले केहि न केहि सहयोग गर्ने छौं, यो विषयमा समितिमा छलफल गर्नेछौं ।’

अध्यक्ष साई सहितको टोलीलाई सहाराका अध्यक्ष अध्यक्ष वीरभद्र आचार्य, निर्वतमान अध्यक्ष विक्रम थकाली, बरिष्ठ उपाध्यक्ष केशव बहादुर थापालगायतले स्वागत गरेका थिए । सहारा एकेडेमीको अक्षयकोष स्थापनाको लागि हालसम्म करिब एक करोड २५ लाख रुपैया संकलन भइसकेको क्लबले जनाएको छ ।

क्लबद्धारा संञ्चालित कठिन परिस्थिति एवँ विपन्न वर्गका बालकहरु सम्मिलित १६ जिल्लाका २८ जना बालकहरुलाई निशुल्क शिक्षा दिक्षा, स्वास्थ्य, फुटबल प्रशिक्षण गराउदै आएको महासचिव केशवराज बरालले जानकारी दिए ।