सर्लाही (हाम्रो खेलकुद)– विभागिय टोली त्रिभुवन आर्मी क्लब सर्लाहीको बागमतीमा जारी राजर्षि जनक कप फुटबल प्रतियोगिताको फाइनलमा पुगेको छ । अर्को विभागिय टोली नेपाल एपिएफ क्लबलाई सोमबार ३–० ले हराउँदै आर्मीले लक्ष्मी हुन्डाई मनाङ मस्र्याङ्दी क्लबसँगको उपाधि भिडन्त पक्का गरेको हो । हारभेस्ट हिमालयन शेर्पालाई आइतबार २–० ले हराउँदै मनाङ फाइनलको यात्रा तय गरेको थियो । फाइनल बुधबार हुनेछ ।

आर्मी र मनाङमध्ये जसले जितेपनि टोलीको त्यो बर्षको चौथो उपाधि हुनेछ र त्यो टोली बर्षको सर्वाधिक सफल टोली हुनेछ । आर्मी, मनाङ र सिएमजी क्लब संकटाले यो बर्ष समान नकआउट फुटबलका तीन उपाधि जितिसकेका छन् ।

एपिएफविरुद्ध आर्मीले सबै गोल दोस्रो हाफमा गरेको हो । पहिलो गोल जर्ज प्रिन्स कार्कीले ५३ औं मिनेटमा गरेका थिए । त्यस्तो शेषराज महतोले ८० औं मिनेटमा गोल गरे भने अन्तिम गोल टंक बस्नेतले इन्जुरी समयको तेस्रो मिनेटमा गरेका थिए । खेलको म्यान अफ दी म्याच घोषित भएका आर्मीका गोलकिपर महेश्वर श्रेष्ठले ५ हजार रुपैयाँ प्राप्त गरे ।

आर्मी र मनाङले झन्डै तीन महिनापछि फेरी एकपटक उपाधिका लागि प्रतिस्पर्धा गर्नेछन् । यी दुई टोलीबीच पछिल्लो पटक पुसमा टुबोर्ग हेटौडा गोल्ड कपमा भेट भएको थियो । जसमा आर्मीले मनाङलाई हराएको थियो ।

आर्मीले त्यसअघि चितवनमा नेपाल कप र दुहबी गोल्ड कपको उपाधि जितेको थियो । पुस यता भने आर्मीले कुनै उपाधि जितेको छैन । हेटौडापछि लगत्तै सुदूरपश्चिमाञ्चलको खप्तड गोल्ड कपको उपाधि जितेको मनाङले त्यसपछि लगातार पोखरामा आहा रारा गोल्डकप र झापामा रमपम झापा गोल्डकप फुटबल प्रतियोगिताको उपाधि जितेको थियो ।

संकटाले चितवनमा विकास रनिङ शिल्ड, रुस्लान सिमरा गोल्ड कप र रुपन्देहीमा तिलोत्तमा गोल्ड कप उपाधि जितेको थियो । बागमति युवा क्लबको आयोजनामा सञ्चालित प्रतियोगिताको प्रतियोगिताको विजेताले उपाधिसहित ४ लाख र दोस्रो हुने टोलीले २ लाख रुपैयाँ प्राप्त गर्नेछ ।