काठमाडौं, असोज १८
रोमाञ्चक मोडमा पुगेको राष्ट्रिय लिगमा आज एकमात्र खेलमा लक्ष्मी हुन्डाई मनाङ र शसस्त्र प्रहरी बलको एपिएफबीच हुँदैछ । खेल एन्फा कम्प्लेक्स सातदोबाटोमा २ः३०  बजे सुरु हुनेछ । लिगको अन्तिम चरणमा पुग्दा ए डिभिजन लिगको कीर्तिमान सात पटकको च्याम्पियन मनाड यो पटक केही कमजोर देखिएको छ । २०६३ यता लिग खेल्दै आएपछि एपिएफ अहिले सम्म च्याम्पियन बन्नेको छैन । पाँचौं स्थान एपिएफको अहिले सम्म उच्च प्रदर्शन हो ।

फाइल तस्वीर – मनाङका डोडोज (बायाँ) र विशाल राई ।

दुवै टोलीलाई राम्ररी थाहा छ एउटा हारले उपाधि दौडबाट बाहिरिनु पर्ने हुन सक्छ । त्यसैले दुवै टोली कम्तीमा नहार्ने प्रयासमा हुनेछन् ।
लामो खेल जीवन पार गर्दै प्रशिक्षणमा खारिएका दुई टोलीका प्रशिक्षकले अहिले सम्म लिग उपाधिको स्वाद चाख्न पाएका छैनन् । राष्ट्रिय टोली पूर्व स्टइकर एवंम प्रशिक्षक समेत रहेका कृष्ण थापाले यसअघि मनाडलाई प्रशिक्षण दिइसकेका छन् । उनको नेतृत्वमा मनाङले पहिलो एनसेल कप जितेको थियो । तर उनी लामो समय मनाडमा टिकेनन् ।
यता एनआरटीमा लामो समय प्रशिक्षण दिएका राजु शाक्यले मनाड जानुअघि मच्छिन्द्र, आर्मी हेरेका थिए । तर उनले कुनै टोलीलाई लिगको च्याम्पियन बनाउन सकेका छैनन्् । दुवैले आजको खेललाई महत्वका साथ हेरेका छन् । थापा मनाङलाई हराउन सके लिग जित्ने सम्भावना रहेको बताउँछन् । उता शाक्य हरेक खेल उत्तिकै महत्वपूर्ण भएकाले उपाधि दौडलाई कायम राख्न जित्दै पर्ने बताउँछन् । २६ अंकसहित शीर्षस्थानमा रहेको रुस्लान थ्री स्टारसँग अंक दुरी छोटउन पनि दुवै टोलीलाई जितको आवश्यकता छ । चौथो स्थानमा रहेको एपिएफको २० र मनाङ १९ अंकका साथ पाँचौ स्थानमा छ ।