दिपक बोहोरा
पाँचथर– पूर्वी पहाडकै इलामको प्रतिष्ठित फुटबल प्रतियोगिता माइभ्याली गोल्ड कप फुटबल प्रतियोगिता यो साताबाट सुरु हुँदैछ । स्थानिय स्तरमा चर्चामा रहेको गोल्ड कप हेर्न यस क्षेत्र र आसपास जिल्लाका फुटबलप्रेमीहरु उत्साहित मात्र होइन हेर्नका लागि समय मिलाउने योजनामा छन् ।

हरेक प्रतियोगिताको आफ्नै महत्व भएजस्तै माइभ्यालीको पनि अलग विशेष रहेको जनाउँदै नेपाल पत्रकार महासंघ जिल्ला शाखा पाँचथरका सचिब गिरीराज बास्कोटाले सके सम्म सबै खेल हेर्ने बताएका छन् । नेपाल बिद्यार्थी संघका सचिव धनकुमार लावती पनि भ्याली गोल्डकप हेर्न कुरिरहेको बताउँछन् । उनले भने, ‘अहिले देशमा लिग नभएको अवस्थामा यस्ता गोल्ड कपले नेपाली फुटबल धानेको छ । सके सम्म माइभ्याली गोल्ड कपका सबै खेल हेर्ने योजना छ । ’

झापा बिर्तामोड की आरती भट्टराई लक्ष्मी हुन्डाई मनाङ मस्याङ्दीकी समर्थक हुन् । भ्याएसम्म आसपासमा हुने प्रतियोगितामा मनाङको खेल हेर्न उनी पुग्ने गरेकी छिन् । यसपटक मनाङ पनि माइभ्याली कपमा भाग लिने भएकाले उनी थप उत्साहित छिन् । उनले मनाङका खेल हेर्न इलाम पुग्ने योजना सुनाइन् ।

पाँचथरका साहित्यकार तथा खेल बिश्लेषक सगुन सुसारा पनि माइ भ्याली गोल्ड कपका लागि समय व्यवस्थान गर्ने बताउँछन् । माइभ्याली गोल्ड कपको तेस्रो संस्करणसम्म आइपुग्दा यसको अलग पहिचान बनिसकेको छ । दशर्कको सुविधाका लागि आयोजकले अस्थाइ प्यारापिट तयार पारिसकेको छ । प्रतियोगिताको सफलताका लागि व्यवस्थापन चुस्त बनाउने प्रयास गरिएको जिल्ला फुटबल संघ इलामका अध्यक्ष निरज खड्कीले बताए ।

माइभ्याली प्रतियोगिताको विजेताले उपाधिसहित ४ लाख र दोस्रो २ लाख ५० हजार रुपैयाँ प्राप्त गर्नेछन् । उत्कृष्ट खेलाडीले १५० सिसिको यमाहा मोटरसाइकल प्राप्त गर्ने छन् । हरेक खेलको म्यान अफ दि म्याचले ७ हजार रुपैयाँ पाउनेछन् । प्रतियोगिताका सर्वाधिक गोलकर्ताले २५ हजार रुपैयाँ पाउनेछन् । बिहीबार हुने उद्घाटन खेलमा आयोजक माइभ्याली फुटबल क्लब इलाम र नेपाल पुलिस क्लबबीच प्रतिस्पर्धा हुनेछ ।