सर्लाही (हाम्रो खेलकुद)– नेपाल एपिएफ क्लब सर्लाहीको बागमतीमा जारी राजर्षि जनक कप फुटबल प्रतियोगिताको सेमिफाइनलमा पुगेको छ । ए डिभिजन प्रतिद्वन्द्वि जावलाखेल युथ क्लबलाई शनिबार २–० ले हराउँदै एपिएफ अन्तिम चारमा पुगेको हो । टोलीलाई जित दिलाउन नवीन लामा र राजेन्द्र रावलले गोल गरेका थिए । एपिएफले सोमबारको सेमिफाइनलमा अर्को विभागिय टोली त्रिभुवन आर्मी क्लबको सामना गर्नेछ ।

१४ औं मिनेटमा नवीनले एपिएफलाई अग्रता दिलाएका थिए । सन्तोष श्रेष्ठको पासमा नवीनले गोल गरेका थिए । राजेन्द्रले ६४ औं मिनेटमा गोल गर्दै गोलअन्तर दोब्बर पारेका थिए । रुपबहादुर लामाको कर्नरमा राजेन्द्रले गोल गरेका हुन् । पुसमा पूर्वाञ्चलमा सम्पन्न सातौं राष्ट्रिय खेलकुदमा स्वर्ण पदक जितेयता एपिएफले आधा दर्जनभन्दा बढी नकआउट प्रतियोगितामा भाग लिएपनि उपाधि जित्न सकेको छैन ।

दुई मुख्य खेलाडी दाजु भाई रञ्जन र अञ्जन विष्ट अहिले टोलीमा छैनन् । दुई दाजु भाई राष्ट्रिय टोलीमा रहेका छन् । जावलाखेलसँगको खेलमा नवीन म्यान अफ दी म्याच घोषित भएका थिए ।

बागमति युवा क्लबले आयोजना गरेको प्रतियोगितामा आइतबार लक्ष्मी हुन्डाई मनाङ मस्र्याङ्दी र हिमालयन शेर्पाबीच पहिलो सेमिफाइनल हुनेछ । मनाङले ब्वाइज युनियन र हिमालयन शेर्पाले सिएमजी क्लब संकटालाई हराउँदै अन्तिम चारको यात्रा तय गरेका थिए । प्रतियोगिताको विजेताले ४ लाख र दोस्रो हुने टोलीले २ लाख रुपैयाँ प्राप्त गर्नेछन् ।

राजर्षि जनक कपको आइतबार पहिलो सेमिफाइनल
मनाङविरुद्ध हिमालयन शेर्पा