काठमाडौं (हाम्रो खेलकुद)– नेपाली खेलकुदका दुई लोकप्रिय खेलका राष्ट्रिय टोली एकै दिन शनिबार विदेश यात्रामा निस्कदैछ । नेपाली फुटबल टोली एसियन कप छनोटको अवे खेलका लागि फिलिपिन्स र क्रिकेट टोली बंगलादेशमा आयोजना हुने इमर्जिङ कप खेल्नका लागि त्यसतर्फ प्रस्थान गर्दैछ ।

संयोगले दुवै टोलीको खेल एकै दिन चैत १५ गते पनि परेको छ । नेपाली फुटबल टोलीले रिजाल रंगशालामा फिलिपिन्ससँग प्रतिस्पर्धा गर्नुअघि उता नेपाली क्रिकेट टोलीले आयोजक बंगलादेशसँग खेल्नेछ । फुटबल टोली फिलिपिन्ससँगको एउटा अवे खेल खेलेर फर्कनेछ भने क्रिकेटमा नेपालले समूह चरणका कम्तीमा तीन खेल खेल्नेछ ।

नेपालले चैत १४ मा पाकिस्तानसँग खेल्दै इमर्जिङ कपको सुरुआत गर्नेछ । चैत १५ मा बंगलादेशसँग खेलेपछि नेपाली टोलीले चैत १७ मा हङकङको सामना गर्नेछ । क्रिकेट टोली आज साँझ ५ बजे बंगलादेश र फुटबल टोली राती ११ बजे फिलिपिन्सका लागि प्रस्थान गर्नेछ ।

दुवै टोलीका प्रशिक्षकले सफलताको आशा गरेका छन् । क्रिकेट टोलीका प्रशिक्षक जगत टमाटाले कम्ती दोस्रो चरण पुग्ने लक्ष्य लिइएको बताएका छन् । नेपाल टोलीले गत महिनाको अन्त्यमा केन्यासँग विश्व क्रिकेट लिग च्याम्पियनसिपका दुई खेल खेलेको थियो । त्यसमा फागुन २८ गतेको पहिलो खेल ५ विकेटले गुमाएपछि नेपालले दोस्रो खेल फागुन ३० गते ७ विकेटले जितेको थियो ।

पेटको शल्यक्रियापछि पूर्ण रुपमा फिट नभएका कारण त्यो दुई खेल गुमाएका नियमित कप्तान पारस खड्कासहित शक्ति गौचन, वसन्त रेग्मी र सोमपाल कामीलाई यसपटक आराम दिइएको छ । नयाँ खेलाडीलाई अनुभव बटुल्ने मौकाका रुपमा पनि बंगलादेश यात्रालाई प्रशिक्षक टमाटाले हेरेका छन् । नेपालले ज्ञानेन्द्र मल्लको कप्तानीमा इमर्जिङ कप खेल्नेछ ।

उता फुटबल टोलीका जापानी मुख्य प्रशिक्षक ग्यातुको कोजीले फिलिपिन्स नेपालभन्दा स्तरीय टोली भएपनि जितका लागि प्रयास गर्ने बताएका छन् । मैत्रीपूर्ण खेल विना फिलिपिन्ससँग खेल्नुपर्दा केही कठिनाई भने पक्कै हुने उनको अनुमान छ । कप्तान विराज महर्जनले सके जित नत्र कम्तीमा बराबरी गर्ने लक्ष्यका साथ टोली यात्रामा निस्कन लागेको बताएका छन् ।

कात्तिकको अन्त्यमा एएफसी सोलिडारिटी कप जितेको र ग्वामले भाग लिन नपाउने भएपछि नेपालले फेरी एकपटक एसियन कप छनोट खेल्ने अवसर पाएको हो । झन्डै ५ महिनापछि नेपाली टोली मैदान उत्रने तयारीमा छ । समूह एफमा नेपाल र फिलिपिन्ससहित यमन र ताजकिस्तान रहेका छन् ।