मोन्टेभिडियो (एजेन्सी) – रसियामा सन् २०१८ मा हुने विश्वकप फुटबल छनोट अन्तर्गत शुक्रबार बिहान दक्षिण अमेरिकी छनोटमा कोपा अमेरिका विजेता चिली र अर्जेन्टिना आमने सामने हुदैछन्।

शुक्रबार बिहान हुने खेल अर्जेन्टिनाका लागि निकै महत्वपू्र्ण छ। कोपा अमेरिका विजेता टोलीमाथि जित निकाल्न सके अर्जेन्टिनाले रसिया विश्वकपका लागि सिधै छनोट हुने सम्भावना राख्नेछ। विश्वकप छनोटको पछिल्ला चार खेलमा पेरु र भेनेजुएलासँग बराबरी तथा पाराग्वे र ब्राजिलसँग हार व्यहोरेपछि अर्जेन्टिनाको विश्वकपमा छनोट हुने सम्भावना कमजोर बनेको थियो।

छनोट चरणअन्तर्गत सान्टियागोमा गत मार्चमा अर्जेन्टिनाले चिलीलाई २–१ ले पराजित गरेको थियो । तर, त्यो हारको बदला गत जुनमा अमेरिकामा सम्पन्न कोपा अमेरिकाको फाइनलमा चिलीले लिएको थियो। छनोट चरणमा अर्जेन्टिनाले पाँच खेलमा जित, चार बराबरी र तीनमा हार बेहोरेको छ।

१० राष्ट्र सम्मिलित दक्षिण अमेरिकी छनोटमा अर्जेन्टिना १२ खेलबाट १९ अंक जोड्दै पाँचौ स्थानमा छ। अर्जेन्टिनाभन्दा अघि चिली चौथो स्थानमा छ। दक्षिण अमेरिकाबाट शीर्ष चार टोली स्वत: विश्वकपमा छनोट हुने प्रावधान छ।

चिलीविरुद्धको खेलमा अर्जेन्टिनालाई स्टार खेलाडीहरु लियोनेल मेस्सी र एन्जल डि मारियाको साथ रहनेछ। यस्तै म्यानचेस्टर सिटीका सर्जियो अगुएरो र म्यानेचस्टर युनाइटेडका मार्काेस रोजोपनि टोलीमा रहेका छन्। यता चिलीलाई भने खेलाडीहरु चोट टाउको दुखाई बन्न सक्छ। आर्टुरो भिडाल प्रतिबन्धका  कारण अर्जेन्टिनाविरुद्धको खेलमा उपस्थित हुने छैन भने एलेक्सिस स्यान्चेजले खेल्नेमा शंका छ।

दक्षिण अमेरिकी छनोटअन्तर्गत बिहीबार मोन्टेभिडियोमा हुने अर्को खेलमा ब्राजिलले उरुग्वेको सामना गर्दैछ। यस्तै अर्काे खेलमा कोलम्विया भेनेजुएला, पाराग्वे इक्वेडर र भेनेजुएला र पेरुले खेल्नेछ।

अर्जेन्टिना र चिलीबिचको खेल नेपाली समयानुसार शुक्रबार बिहान ५:१५ बजे हुनेछ।