मोन्टेभिडियो (एजेन्सी) – फिफा विश्वकप २०१८को छनोट चरण अन्तर्गत उरुग्वे र ब्राजिल आमनेसामने हुँदैछन्। ब्राजिलले प्रशिक्षक पदमा टिटेलाइ नियुक्त गरेयता लगातार ६ खेलमा जित हात पारेको छ र यस जितसंगै विश्वकपमा आफ्नो नाम पक्का गर्ने सम्भावना रहेको छ।

उरुग्वेले आफ्नो घरेलु मैदानमा खेलेको ६ ओटै खेलमा जित दर्ता गरेको छ। यधपी उरुग्वेले पछिल्लो चरणमा पहेंलो कार्ड खाएका कारण लुइस सुआरेजलाई खेलाउन पाउने छैन। यसबाहेक एट्लेटीको म्याड्रिडका डिफेन्डर होसे मारिया जिमिनेज र गोलरक्षक फर्नान्डो मस्लेरा पनि प्रतिबन्धका कारण उपलब्ध रहने छैनन्।

ब्राजिलले लागि भने म्यानचेस्टर सिटीका ग्याब्रियल जेसस चोटका कारण खेल्न नसक्ने भएपछि आक्रमणको जिम्मेवारी लिभरपुलका रोबर्टो फिर्मिनोलाई सुम्पिएको छ। उनलाई सहयोग गर्न बार्सिलोनाका नेयमार र उनकै क्लबका फिलिप कौटिन्हो साथमा हुनेछन्।

छनोट चरणको ६ खेल बाँकी रहेको अवस्थामा ब्राजिल १२ खेलमा २७ अंक बोकेर शीर्षस्थानमा रहेको छ। दोश्रो स्थानमा रहेको उरुग्वेको भने २३ अंक रहेको छ। शीर्ष ४ स्थानमा रहने टोलीले सिधै विश्वकप खेल्न पाउँछन् भने पाँचौ रहने टोलीले छनोट हुन प्लेअफ खेल्नुपर्ने प्रावधान रहेको छ।

ब्राजिल र उरुग्वेबिचको खेल नेपाली समयानुसार शुक्रबार विहान ४:४५बजे हुनेछ।