काँकरभिट्टा (हाम्रो खेलकुद)– मेची नेत्रालय काँकरभिट्टा गोल्ड कपको दोस्रो संस्करणमा ७ लाख रुपैयाँ भन्दा बढी बचत भएको छ । गत पुसमा काँकरभिट्टा सम्पन्न गोल्डकपमा कुल ३९ लाख २३ हजार ४ सय ६३ रुपैयाँ आम्दानी भएको सोमबार आयोजित पत्रकार सम्मेलनमा आयोजक काँकरभिट्टा फुटबल ट्रेनिङ सेन्टरका कोषाध्यक्ष पेमा नोबु शेर्पाले जानकारी दिए ।

पुस १६ देखि २३ गते सम्म काँकरभिट्टा माविमा सम्पन्न प्रतियोगितामा ३१ लाख ८७ हजार ८० रुपैयाँ खर्च भएको बताइएको छ । कोषाध्यक्ष शेर्पाका अनुसार प्रतियोगिताबाट ७ लाख ३६ हजार ३ सय ८३ रुपैयाँ बचत भएको छ । काँकरभिट्टा गोल्डकपको उपाधि रमपम झापा ११ ले जितेको थियो ।

 बचत रकमबाट सेन्टरले प्रत्येक वर्ष आयोजना गर्दै आएको सिटी लिग फुटबल प्रतियोगिता, अन्तर मावि स्तरीय, वडा स्तरीय प्रतियोगिता सञ्चालन र सेन्टरले उत्पादन गरेका खेलाडीका लागि खेलकुद सामग्री खरिदमा खर्च गरिने सेन्टरका अध्यक्ष अध्यक्ष मीनबहादुर बस्नेतले जानकारी दिए । अध्यक्ष बस्नेतले तेस्रो गोल्ड कप प्रतियोगिताको पुरस्कार राशीमा बृद्धि गरि प्रतियोगितालाई थप व्यवस्थित गरिने बताए ।

सम्मेलनमा प्रतियोगिता सहयोग समितिका सदस्य राजु कार्की, मेची फुटबल क्लबका कोषाध्यक्ष कर्णबहादुर थापा, एन्फा प्रशिक्षक दीपक कार्की, काँकरभिट्टा भेट्रान फुटबल क्लबबा अध्यक्ष तथा प्रतियोगिता सहयोग समितिका सल्लाहकार संयोजक गंगालाल गुरुङ, सञ्चालन सहयोग समिति सदस्य शेरबहादुर बस्नेत (सुन्दर) को उपस्थिति थियो ।