बार्सिलोना (एजेन्सी) – बार्सिलोनाले स्पेनिस ला लिगामा शीर्षस्थानको रियल म्याड्रिडसँगको अंक दुरीलाई पुनः घटाएको छ । १० खेलाडीमा सिमित भ्यालेन्सियालाई गए राती ४–२ ले हराउँदै बार्सिलोनाले रियलसँगको दुरी छोट्टाएको हो । टोलीको जितमा लियोनल मेस्सीले २ तथा लुइस स्वारेज र एन्ड्रे गोमेजले गोल गरेका थिए।

७८ हजार बढी दर्शकको उपस्थित रहेको क्याप नोउमा भ्यालेन्सियाका लागि २९ औं मिनेटमा इलिक्वीम मांगला गोल गरेका थिए । तर, त्यो अग्रता लामो समय टिकेन । ३५ औं मिनेटमा स्वारेजले बराबरी गोल फर्काए । पहिलो हाफको अन्त्यतिर मांगलाले रातो कार्ड पाएपछि भ्रमणकारी टोली १० खेलाडीमा सिमित भएको थियो ।

स्वारेजलाई पेनाल्टी बक्समा लडाएपछि मांगलाले रातो कार्ड पाएका हुन् । त्यहि घटनामा प्राप्त पेनाल्टीमा मेस्सीले गोल गर्दै बार्सिलोनालाई अग्रता दिलाएका थिए । तर, त्यो अग्रता पनि लामो समय टेकिने । पहिलो हाफको इन्जुरी समयमा मुनिर इल हाडादीले बराबरी गोल फर्काए । बार्सिलोनाबाट लोनमा भ्यालेन्सिया पुगेका मुनिरले गोलले खुसीयाली भने मनाएनन् ।

दोस्रो हाफको सुरुआतमा मेस्सीले उत्कृष्ट गोलमार्फत बार्सिलोनालाई पुनः अग्रता दिलाएका थिए । चोटमुक्त भएर फर्केका नेमारले दोस्रो हाफमा फ्रिकिकमार्फत गोल गर्ने प्रयास गरेपनि सफल भएनन् । उनको प्रहार पोस्टमा लागेर फर्केको थियो । खेल सकिन दुई मिनेट बाँकी रहँदा नेमारको पासमा गोमेजले ट्यापमार्फत गोल गर्दै टोलीको जितलाई सहज बनाएका थिए ।

जित पछि बार्सिलोना शीर्षस्थानका रियालभन्दा २ अंकले पछाडि छ । जिनेदिन जिदानको टोलीले बार्सिलोनाले भन्दा १ खेल कम खेलेको छ ।
हाइलाइट्स