प्रकाश तिमल्सिना

काठमाडौं – हरेक खेलाडीले राष्ट्रिय टोलीबाट एक दिन विदा लिनैपर्दछ । मात्र यति फरक हो, कतिले अपेक्षा गरे अनुसारको विदाई पाउछन् भने कतिले अनेपेक्षित रुपमा विदा लिनुपर्ने हुन्छ । राष्ट्रिय फुटबल टोलीको नियमित कप्तान रहँदाकै अवस्थामा अनिल गुरुङका लागि यसपटकको टोलीको छनोट अनेपक्षित रह्यो ।

एसियन कप छनोट अन्तर्गत फिलिपिन्सविरुद्ध चैत १५ मा हुने पहिलो लेगका लागि शुक्रबार घोषणा गरिएको २० सदस्यीय टोलीमा अनिल परेनन् । यद्दपी एक पटक राष्ट्रिय टोलीमा नपर्दैमा त्यसलाई आफ्नो विदाइका रुपमा भने उनले लिएका छैनन् । एउटा खेलाडीका रुपमा टोलीमा पर्नु वा नपर्नुलाई उनले एकदम ठूलो विषय पनि मान्दैनन् । तर, व्यवस्थापन र प्रशिक्षण टोलीसँग भने उनको गुनासो छ । ‘मैले घरेलु फुटबलमा राम्रो प्रदर्शन गरिरहेको छु । फिट पनि छु,’ उनले भने,‘ तर, त्यस्तो भन्दैमा म टोलीमा पर्नै पर्ने भन्ने होइन । प्रशिक्षकका नजरमा म भन्दा फिट र राम्रो खेलाडी अरु हुन सक्छन् ।

आफु राष्ट्रिय टोलीमा नपरेको अरुबाट सुन्नुपर्दा झनै बढी दुःख लागेको अनिलले बताए ।

तर, एउटा कप्तानका नाताले व्यवस्थापन, प्रशिक्षकहरुले सामान्य सल्लाह गरेको भए राम्रो हुन्थ्यो । त्यसमा मलाई अलि खल्लो लाग्यो ।’ आफु राष्ट्रिय टोलीमा नपरेको अरुबाट सुन्नुपर्दा झनै बढी दुःख लागेको अनिलले बताए । ‘ट्रेनिङबाट फर्केर घरमात्र पुगेको थिए ,’ उनले स्मरण गरे,‘एउटा ‘फ्यान’ ले फोन गरेर दाई तपाईको त नाम छैन नी भन्दा म छ छक्क परे । विश्वास नै लागेन । सँगसँगै दुःख पनि लाग्यो । मलाई राख्नु थिएन भने कम्तीमा एकवचन सोधेको भए मलाई राख्नै पर्छ त भन्ने थिइन ।’ राष्ट्रिय टोलीलाई फिलिपिन्सविरुद्धको खेलका लागि सफलताका शुभकामना दिदै अनिलले थपे,‘ म एउटा खेलाडी हु । मैले खेल जीवनमा सबै खाले उतार चढाव भोगेको छु । म निराश, हतास केही छैन । अझै मेहनत गरेर फेरी राष्ट्रिय टोलीमा पुनरागमन गर्नेछु ।’

सन् २००७ को विश्व कप छनोटमा ओमानविरुद्ध डेब्यू गरेका अनिल चोटका कारण २००८ को च्यालेन्ज कप छनोट र साफ च्याम्प्यिनसिपमा टोली बाहिर थिए । गत बर्ष बंगबन्धु गोल्डकप र केही मैत्रीपूर्ण खेल गुमाउनु बाहेक अनिल लगातार टोलीका सदस्य रहँदै आएका थिए । सन् २०१५ बाट टोलीका कप्तान बनेका अनिलले राष्ट्रिय टोलीबाट ४९ खेल खेल्दै ९ गोल गरेका छन् ।