काठमाडौं (हाम्रो खेलकुद)– राष्ट्रिय फुटबल टोलीका गोलकिपर किरण चेम्जोङ माल्दिभ्सबाट भोली (सोमबार) स्वदेश फर्कदैछन् । किरण माल्दिभ्सको टिसी स्पोर्टस क्लबबाट व्यवसायिक फुटबल खेल्दै आएका छन् । एसियन कप छनोटअन्तगर्त फिलिपिन्ससँग पहिलो लेगका लागि २० सदस्यीय टोलीमा रहेको किरण मंगलबार काठमाडौं आइपुग्नेछन् ।

‘म भोली फर्कदैछु,’ किरणले हाम्रो खेलकुदसँग भने,‘काठमाडौं पर्सी आइपुग्नेछु ।’ नेपाल र फिलिपिन्सबीचको पहिलो लेग चैत १५ मा फिलिपिन्समा हुँदैछ । माल्दिभ्स लिगमा आइतबार बेलुकाको लागि टिसी स्पोर्टस र भिक्ट्री स्पोर्टस क्लबको तय भएकाले किरण त्यो खेलेर स्वदेश फर्कने तयारीमा छन् ।

किरणको टोलीले लिगमा अहिले सम्म एउटामात्र खेल खेलेको छ । माल्दिभ्समा लिग सुरु हुँदा टिसी स्पोर्टस भने बंगलादेशमा आयोजना भएको शेख कमल अन्तर्राष्ट्रिय क्लब कपमा भाग लिइरहेको थियो । लक्ष्मी हुन्डाई मनाङ मस्र्याङ्दीलाई सेमिफाइनलमा हराएको टिसी स्पोर्टसले शेख कमल अन्तर्राष्ट्रिय उपाधि जितेको थियो । पूर्व क्लब मनाङविरुद्ध उच्च प्रदर्शन गरेका किरण त्यो खेलमा म्यान अफ दी म्याच घोषित भएका थिए ।

बंगलादेशबाट फर्केर टिसी स्पोर्टसले लिगको मार्च ११ मा भएको आफ्नो पहिलो खेल जितेको थियो । किरण पुसमा टिसी स्पोर्टस्मा आवद्ध भएका थिए । त्यसअघि मनाङबाट खेलेका किरणले लामो समय रुस्लान थ्री स्टार क्लबमा विताएका थिए । कात्तिक अन्त्यमा एएफसी सोलिडारिटी कप जितेपछि र ग्वामले छनोट खेल्न नपाउने भएपछि नेपालले पुनः एसियन कप छनोट खेल्न पाउने भएको थियो । नेपाल र फिलिपिन्स रहेको समूह ‘एफ’ मा यमन र ताजकिस्तान छन् ।