म्यानचेस्टर (एजेन्सी)– आगामी सिजन च्यामपियन्स लिगमा आफ्नो स्थान पक्का प्रयासरत दुई टोली म्यानचेस्टर सिटी र लिभरपुल प्रिमियर लिगमा आज आमने सामाने हुँदैछन् । तेस्रो स्थानमा रहेको म्यानचेस्टर सिटीले चौथो स्थानमा रहेको लिभरपुललाई घरेलु मैदानमा निम्त्याउँदैछ ।

सिटीको २७ खेलमा १७ जित सहित ५६ अंक छ । दोस्रो स्थानको टोटेनह्यामको पनि ५६ अंक नैछ । सिटी गोल भिन्नताको आधारमा मात्र तल छ । त्यस्तै चौथो स्थानको लिभरपुलले सिटी भन्दा १ खेल बढी खेलेको छ र र टोलीको १ अंक कम छ । सिटीलाई हराउदै लिभरपुल तेस्रो स्थानमा उक्लने प्रयासमा हुनेछ ।

सिटीले लिभरपुलसँगको अघिल्ला ४ भेटमा हारको सामना गरेको छ । अघिल्लो ४ भेटमा १–० , ३–० , ४–१ र २–१ ले पछि परेको सिटीले सन् २०१४ को अगष्ट यता लिभरपुललाई जित्न सकेको छैन । सिटीले यसअघि लिभरपुललाई २०१४ को अगष्टमा घरेलु मैदानमा ३–१ ले हराएको थियो ।

च्याम्पियन्स लिगको अन्तिम १६ को पहिलो लेगमा २ गोल को अग्रता हुँदा हुँदै दोस्रो लेगपछि बाहिरिएको सिटीका अधिकांश खेलाडी फिट छन् । उता लिभरपुलका फर्मिनो ग्रोइनको चोटका कारण खेल्ने निश्चित छैन भने ओरिगी पनि बिरामी छन् । लिभरपुलका नियमित कप्तान जोर्डन हेनडरसन र स्टुरिजले चोटका कारण खेल गुमाउने सम्भावना छ भने स्ट्राइकर इंग्स लामो समयदेखि मैदान बाहिर छन् ।