सौरभ गिरी

नेपालगञ्ज – टुबार्ग दोस्रो नेपालगञ्ज गोल्डकप फुटबल प्रतियोगिताको सर्वोत्कृष्ट खेलाडीले सुजुकीको मोटरसाइकल पुरस्कार जित्नेछन् । सर्वोत्कृष्ट छनोटका लागि छुट्टै समिति बनाइएको आयोजक बाँके जिल्ला फुटबल संघका अध्यक्ष भोजराज शाहीले जानकारी दिए ।

आज अग्नी रुपन्देही ११ र सिएमजी क्लब संकटाको फाइनल पछि सर्वोत्कृष्ट खेलाडी घोषणा गरिनेछ । नेपालगञ्ज गोल्डकपलाई मध्यपश्चिमकै ठूलो फुटबल प्रतियोगिताका रुपमा हेरिएको छ । नेपागञ्ज रंगशालामा दिउँसो ३ बजे फाइनल सुरु हुनेछ । जारी सिजनमा संकटाको यो सातौं र रुपन्देहीको दोस्रो फाइनल हो । ६ वटा फाइनल खेल्दा संकटाले तीनवटा उपाधि जितेको थियो । यो सिजन तीन उपाधि जित्नेमा संकटासहित त्रिभुवन आर्मी क्लब र लक्ष्मी हुन्डाई मनाङ मस्र्याङ्दी छन् । संकटाले बुटवलको तिलोत्तमा, नारायणघाटको विकास रनिङ शिल्ड र सिमरा गोल्डकपको उपाधि जितेको थियो । सुदूरपश्चिमको खप्तड, नवलपरासीको राइनो राइजिङ र धरानको बुढासुब्बा गोल्डकपमा संकटा दोस्रो भएको थियो ।

रुपन्देहीले भने गत महिना उदयपुर गोल्डकपको उपाधि जितेको थियो । संकटा र अग्नि रुपन्देही यस अघि गत महिना धरानको बुढासुब्बा गोल्डकपको सेमिफाइनलमा एकपटक मात्रै आमने सामने भएका थिए । त्यसमा संकटा २–१ विजयी बनेको थियो । नेपालगञ्ज गोल्डकपमा सशस्त्र प्रहरीको एपीएफलाई २–१ र सुदूरपश्चिम ११ लाई ट्राइबेकरमा ५ –४ गोलले पराजित गरेर संकटाले अन्तिम दुईको यात्रा तय गरेको थियो । अग्नि रुपन्देहीले नेपालकै बलियो फुटबल क्लब लक्ष्मी हुन्डाई मनाङ मस्र्याङ्दी र नेपाल प्रहरीलाई हराउँदै उपाधि नजिक पुगेको थियो । अग्नि रुपन्देहीले ए डिभिजन टोली मनाङ र पुलिसलाई समान २–१ गोलले स्तब्ध बनाएको थियो ।

संकटा र रुपन्देही दुवैले क्वाटरफाइनल र सेमिफाइनलमा पछि परेर पनि नतिजा उल्टाएका थिए । प्रतियोगिताको विजेताले ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् । गत बर्ष पहिलो संस्करणमा विजेताले १ लाख ५० हजार रुपैयाँ प्राप्त गरेको थियो ।