सौरभ गिरी
नेपालगञ्ज– मध्यपश्चिमकै ठूलो प्रतियोगिताका रुपमा रहेको टुबोर्ग दोस्रो नेपालगञ्ज गोल्डकप फुटबल प्रतियोगिताको बिहीबार फाइनल खेल हुँदैछ । नेपालगञ्जमा संचालन हुदै आइरहेको दोस्रो संस्करणको नेपालगञ्ज गोल्डकपको उपाधिका लागि ए डिभिजन टोली सिएमजी क्लब संकटा र मोफसलको अग्नी रुपन्देही–११ बीच भिडन्त हुदैछ ।

सशस्त्र प्रहरीको एपीएफलाई २–१ र सुदूरपश्चिम ११ लाई ट्राइबेकरमा ५ –४ गोलले पराजित गरेर संकटाले अन्तिम दुईको यात्रा तय गरेको थियो । अग्नि रुपन्देहीले नेपालकै बलियो फुटबल क्लब लक्ष्मी हुन्डाई मनाङ मस्र्याङ्दी र नेपाल प्रहरीलाई हराउँदै उपाधि नजिक पुगेको थियो । अग्नि रुपन्देहीले ए डिभिजन टोली मनाङ र पुलिसलाई समान २–१ गोलले स्तब्ध बनाएको थियो ।संकटा र रुपन्देही दुवैले क्वाटरफाइनल र सेमिफाइनलमा पछि परेर पनि नतिजा उल्टाएका थिए ।
संकटा र अग्नि रुपन्देही यस अघि गत महिना धरानको बुढासुब्बा गोल्डकपको सेमिफाइनलमा एकपटक मात्रै आमने सामने भएका थिए । त्यसमा संकटा २–१ विजयी बनेको थियो । स्थानिय समर्थकको आपार माया र समर्थन पाएको रुपन्देही उपाधि जित्न उच्च मनोबलका साथ मैदानमा उत्रिदै छ ।

तर यस प्रतियोगिताको भोलि हुने फाइनलमा संकटामा अनुभबी खेलाडीहरु भरीभराउ हुदा अग्नि रुपन्देहीलाई भने जस्तो सजिलो नहुने अवस्था छ । संकटा यो वर्षमा ६ वटा फुटबल प्रतियोगिताको फाइनलमा खेलिसकेको छ । जसमध्ये ३ वटा उपाधि जितेको थियो । भर्खर मात्र टोलीले रुपन्देहीमा सम्पन्न तिलोत्तमा गोल्डकपको उपाधि संकटाले जितेको थियो ।

संकटाका प्रशिक्षक सल्यान खड्गीले संकटाले बुटवलको तिलोत्तमा, नारायणघाटको विकास रनिङ शिल्ड र सिमरा गोल्डकपको उपाधि जित्नुका साथै सुदूरपश्चिमको खप्तड, नवलपरासीको राइनो राइजिङ र धरानको बुढासुब्बा गोल्डकपमा फाइनलमा उपविजेता बनेको हाम्रो खेलकुदलाइ बताए ।
प्रशिक्षक खड्गीले पहिलो भन्दा दोस्रो प्रतियोगितामा खेलाडीले स्तरीय प्रदर्शन गर्न नसकेपनि टोली फाइनलमा पुगेकाले अब खेललाई सुधार गरेर उपाधि जित्ने विश्वास व्यक्त गरे ।

रुपन्देही ११ ले भने यसै वर्ष अर्को एउटा उपाधि थप्ने दाउमा रहेको छ । रुपन्देही ११ ले एक महिना अघि मात्र उदयपुरको गाइघाट गोल्डकप फुटबल प्रतियोगिताको उपाधि जितेको थियो । रुपन्देहीका ११ प्रशिक्षक दयाराम सापकोटाले मनाङ र प्रहरीजस्तो बलियो टोलीलाई पराजित गरेकाले खेलाडीको मनोबल उच्च रहेको छ साथै हाम्रा खेलाडीले मनाङसँग खेलेको खेल प्रदर्शन गर्न सकेमा हामीले उपाधि जित्ने प्रशिक्षक सापकोटाले हाम्रो खेलकुदलाई बताए ।