सौरभ गिरी
नेपालगञ्ज– अग्नी रुपन्देही ११ टुबोर्ग दोश्रो नेपालगन्ज गोल्ड कप फुटबल प्रतियोगिताको फाइनलमा पुगेको छ । विभागिय टोली नेपाल पुलिस क्लबलाई मंगलबार २–१ ले हराउँदै रुपन्देहीले सिएमजी क्लब संकटासँगको फाइनल भेट पक्का गरेको हो । सुदूर पश्चिमाञ्चल ११ लाई पेनाल्टी सुट आउटमा ५–४ ले हराउँदै संकटा फाइनल पुगेको थियो ।

नेपालगञ्ज १–० ले पछि परेको खेल उल्टाउँदै रुपन्हेली अन्तिम दुईको यात्रा तय गरेको हो । रुपन्देहीका लागि दुवै गोल अमर डंगोल गरेका थिए । खेलमा अग्रता पुलिसले लिएको थियो । ३३ औं मिनेटमा कप्तान जुमानु राईले पेनाल्टीमा गोल गर्दै पुलिसलाई अग्रता दिलाएका थिए ।

तर, त्यो अग्रता दुई मिनेट भन्दा बढी टिक्न सकेन । अमरले ३५ औं मिनेटमा बराबरी गोल गरे । अमरले हेडमार्फत गोल गरेका थिए । अमरले ७२ औं मिनेटमा गरेको गोल खेलको निर्णायक बन्यो । लक्ष्मण रुचालको पासमा अमरले विजयी गोल पनि हेडमार्फत नै गरेका थिए । म्यान अफ दी म्याच बनेका अमरले लेनोभोको मोबाइल सेट प्राप्त गरे ।

बाँके जिल्ला फुटबल संघ संघका आयोजनामा जारी प्रतियोगिताको विजेताले ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले सुजुकीको मोटरसाइकल प्राप्त गर्नेछन् ।