नेपालगञ्ज (हाम्रो खेलकुद) – टुबोर्ग दोस्रो नेपालगञ्ज गोल्ड कप फुटबल प्रतियोगितामा आज दोस्रो सेमिफाइनलमा अग्नी रुपन्देही ११ र विभागिय टोली नेपाल पुलिस क्लबबीच प्रतिस्पर्धा हुँदैछ । नेपालगञ्ज रंगशालामा दिउँसो ३ बजे सुरु हुने खेलको विजेताले फाइनलमा सिएमजी क्लब संकटाको सामना गर्नेछ ।

फोटो: मनोज थापा

संकटाले सोबार सुदूरपश्चिमाञ्चललाई टाइब्रेकरमा ५–४ ले हराउँदै अन्तिम दुईको यात्रा तय गरेको थियो । नेपालगञ्ज गोल्डकपमा रुपन्देहीले लक्ष्मी हुन्डाई मनाङ मस्र्याङ्दी क्लब र पुलिसले आयोजक नेपालगञ्ज ११ लाई समान २–१ ले हराउँदै अन्तिम चारमा प्रवेश पाएका थिए ।

रुपन्देही र पुलिसले यो बर्ष एक एक वटा नकआउट फुटबल प्रतियोगिताको उपाधि जितेका छन् । पुलिसले गत महिना धरानको १९ औं बुढासुब्बा रेडबुल गोल्डकपको उपाधि जितेको थियो भने त्यसअघि रुपन्देही रममप उदयपुर गोल्ड कपको उपाधि जितेको थियो ।

रुपन्देही र पुलिसले पछिल्लो पटक १९ औं तिलोत्तमा गोल्डकप खेलेका थिए । जहाँ आयोजक रुपन्देही सेमिफाइनल र पुलिस क्वार्टरफाइनल सम्म पुगेका थिए । तिलोत्तमामा दुवै टोली अर्को विभागिय टोली त्रिभुवन आर्मी क्लबसँग पराजित भएका थिए ।

बाँके जिल्ला फुटबल संघको आयोजनामा जारी प्रतियोगिता फाइनल चैत ४ गते हुनेछ । विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछ ।