मड्रिड (एजेन्सी) – रियल मड्रिडले स्पेनिस ला लिगा फुटबलको शीर्षस्थानमा पुनरागमन गरेको छ । गए राती भएको खेलमा सर्जियो रामोसको निर्णायक गोलमा रियल बेटिसलाई २ – १ ले हराउँदै रियल पुनः अग्रस्थानमा पुगेको हो ।

घरेलु मैदानमा भएको खेलमा रियल मड्रिडलाई जित दिलाउन रामोसका अलवा क्रिष्टियानो रोनाल्डोले गोल गरेका थिए । १–० ले पछि परेको अवस्थालाई उल्टाउँदै रियलले जित हासिल गरेको थियो । बेटिसका एन्टोनियो सनाब्रियाले एक गोल फर्काए । बेटिसले १० खेलडीमा सिमित हुँदै खेलको अन्त्य गरेको थियो ।

८१ औं मिनेटमा क्रिस्टियाने पिचिनीले दोहोरो पहेलो कार्ड पाएपछि बेटिस १० खेलाडीमा सिमित भएको थियो । जितपछि रियल बार्सिलोनालाई २ अंकले पछि पार्दै अघि बढेको हो । आइतबार नै बार्सिलोना डिभोर्टिभो लाकुरानासँग २–१ले स्तब्ध भएको थियो । बार्सिलोनाभन्दा एक खेल कम खेलको रियलको २६ खेलबाट ६२ अंक छ । दोस्रो स्थानमा झरेको बार्सिलोनाको ६० अंक छ ।
सान्टियागो बेर्नाबेउमा भएको खेलमा सुरुवाती अग्रता भने रियल बेटिसले लिएको थियो । खेलको २४ औ मिनेटमा एन्टोनियो सनाब्रियाले गोल गर्दै बेटिसलाई अग्रता दिलाए । तर, खेलको ४१ औ मिनेटमा रोनाल्डोले हेडमार्फत गोल गर्दै खेल बराबरीमा ल्याए ।
पहिलो हाफ १ – १ गोलको बराबरीमा सकिएको खेलको ८१ औ मिनेटमा रामोसले गोल गर्दै रियल मड्रिडलाई २ – १ को महत्वपूर्ण जित दिलाए । ला लिगाका अन्य खेलमा एथलेटिको बिलबाओले रियल सोसिडाडलाई २–० ले, भिल्लारियलले सेल्टा भिगोलाई १–० ले हराएको थियो ।