काठमाडौं (हाम्रो खेलकुद) – दश दिनअघि बंगलादेशमा शेख कमल अन्तर्राष्ट्रिय क्लब कपको सेमिफाइनल खेलेका ९ खेलाडी विना लक्ष्मी हुन्डाई मनाङ मस्र्याङ्दी क्लब आज टुबोर्ग दोस्रो नेपालगञ्ज गोल्ड कपमा खेल्दैछ । मनाङ र अग्नी रुपन्देही ११ बीच दिउँसो नेपालगञ्ज रंगशालामा अन्तिम क्वार्टरफाइनल हुनेछ ।

बंगलादेशबाट फर्के लगत्तै शेख कमल खेलेका १० खेलाडी राष्ट्रिय टोलीको प्रशिक्षणमा सामेल भएका थिए । शेख कमल कप कप्तान अनिल गुरुङ, सुजल श्रेष्ठ, रोहित चन्द, विराज महर्जन, विशाल श्रेष्ठ, कमल श्रेष्ठ, हेमन्त थापामगर, विमल बस्नेत, विक्रम लामा र देवेन्द्र तामाङले खेलेका थिए । विक्रम र देवेन्द्रबाहेक ८ मनाङका आफ्नै खेलाडी हुन् । दुई दिनअघिको छनोटमा हेमन्त नपरेपछि उनी भने नेपालगञ्ज पुगिसकेका छन् ।

जारी सिजनमा मनाङ घरेलु टोलीको सर्वाधिक सफल टोलीमध्येको एक हो । मनाङ, त्रिभुवन आर्मी क्लब र सिएमजी क्लब संकटाले समान ३ नकआउट फुटबल प्रतियोगिताको उपाधि जितेका थिए ।  पुसमा प्रशिक्षक छिरिङ लोप्साङ गुरुङले टोली पुनः सम्हालेयता मनाङ छैटौं प्रतियोगिताका रुपमा नेपालञ्ज गोल्डकप खेल्ने तयारीमा छ ।

४ वटा घरेलु नकआउटको फाइनल खेल्दा ३ उपाधि जितेको मनाङ शेख कमलको सेमिफाइनल सम्म पुगेको थियो । पुसमा हेटौडा गोल्डकप फाइनल खेलेको मनाङले त्यसपछि लगातार सुदूरपश्चिमाञ्चल खप्तड गोल्डकप, आहा रारा गोल्डकप र रमपम झापा गोल्ड कप जितेको थियो । त्यसलगत्तै टोली बंगलादेश पुगेको थियो ।

उता रुपन्देहीले उदयपुर गोल्डकपको उपाधि जितेको थियो भने टोली तिलोत्तमा गोल्डकपको सेमिफाइनल पुगेको थियो । मनाङ र रुपन्देही सिजनमा पहिलो पटक एकअर्काविरुद्ध उत्रने तयारीमा छन् । ‘हामीसँग पुरा टोली छैन । तर पनि केही अन्य क्लबका खेलाडी यो प्रतियोगिताका लागि बोलाएका छौं’ मनाङका प्रशिक्षक गुरुङले भने, ‘हेमन्त फर्केका छन्, टोलीका अन्य खेलाडी पनि छन् नै । राम्रै प्रतिस्पर्धा हुने विश्वास छ । ’

बाँके जिल्ला फुटबल संघका आयोजनामा सञ्चालित प्रतियोगिताको फाइनल चैत ४ गते हुनेछ । विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् ।