सौरभ गिरी
नेपालगञ्ज – उत्कृष्ट पुनरागमनका साथ सिएमजी क्लब संकटा टुबार्ग दोस्रो नेपालगञ्ज गोल्ड कप फुटबल प्रतियोगिताको सेमिफाइनलमा पुगेको छ । नेपालगञ्ज रंगशालामा शनिबार विभागिय टोली नेपाल एपिएफ क्लबलाई २–१ ले हराउँदै अन्तिम चारमा पुगेको हो ।

राज पौडेलको निर्णायक गोलमा संकटा विजयी भएको थियो । यसअघि तिलोत्तमा गोल्ड कपको क्वार्टरफाइनलमा संकटाले एपिएफलाई हराएको थियो । संकटाले तिलोत्तमा गोल्डकप जितेको थियो । त्यो संकटाको बर्षको तेस्रो उपाधि हो । एपिएफले ५५ औं मिनेटमा लिएको अग्रता जोगाउन सकेन । श्याम नेपालीले एपिएफका लागि गोल गरेका थिए । खेलमा पछि परेपछि सुधारिएको प्रदर्शन गरेको संकटाले ७२ औं मिनेटमा खेल बराबरी गरेको थियो । रवि सिलवालले बराबरी गोल गरेका थिए ।

७६औं मिनेटमा राजले गोल गरे र त्यहि गोल खेलको निर्णायक बन्यो । म्यान अफ द म्याच बनेका राजले लेनोभो मोबाइल प्राप्त गरेका थिए । अघिल्लो दुई दिन सुदूरपश्चिमाञ्चल ११ र नेपाल पुलिस क्लब विजयी हुँदै नेपालगञ्ज गोल्डकपको सेमिफाइनल पुगिसकेको छन् ।

चैत ४ गते हुने फाइनलको विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् । प्रतियोगिता अवधिभर खेलाडी, रेफ्री, अफिसियलको दुर्घटना विमा एनएलजी इन्सुरेन्स कम्पनी लिमिटेडले गरेको छ ।

बाँके जिल्ला फुटबल संघले आयोजना गरेको प्रतियोगितामा अखिल नेपाल फुटबल संघ (एन्फा), युवा तथाा खेलकुद मन्त्रालय, मध्यपश्चिमाञ्चल खेलकुद विकास समिति, बाँके जिल्ला खेलकुद विकास समितिको सहकार्य रहेको छ ।
नेपालगञ्ज गोल्ड कपमा आइतबारको खेल
लक्ष्मी हुन्डाई मनाङ मस्र्याङ्दीविरुद्ध अग्नी रुपन्देही ११