सौरभ गिरी
नेपालगंज– नेपाल पुलिस क्लब टुबोर्ग दोस्रो नेपालगञ्ज गोल्ड कप फुटबल प्रतियोगिताको सेमिफाइनलमा पुगेको छ । खराब मौसमका कारण ८० मिनेट मात्र खेलाइएको खेलमा आयोजक नेपालगञ्ज ११ लाई २–१ ले हराउँदै विभागिय टोली पुलिस अन्तिम चारमा पुगेको हो ।

नेपालगञ्ज रंगशालामा पुलिसले पहिलो हाफमै २–० को अग्रता लिएर खेलमा पकड बनाएको थियो । पुलिसका लागि हरि कठायत र भरत शाहले गोल गरे । दुवै गोलमा भरतको भूमिका रह्यो । भरतको पासमा हरिले ३४ औं मिनेटमा गोल गरेका थिए । भरतले ३७ औं मिनेटमा गोल गरे ।

दोस्रो हाफमा नेपालगञ्जले खेलमा फर्कने संकेत गर्यो । टोलीका लागि ६२ औं मिनेटमा रेगिज सुब्बाले गोल फर्काए । तर, त्यसपछि टोलीले बराबरीको अवसर पाएर पनि गोल गर्न सकेन । ७५ औं मिनेटमा रेजिगको फ्रिकिक पुलिसका गोलपिकरले रोके । खेलको म्यान दी म्याच घोषित रेगिजले लेनोभको मोबाई प्राप्त गरे ।

पहिलो दिन भारतको दिल्ली युनाइटेडलाई १–० ले हराउँदै साविक विजेता सुदूरपश्चिमाञ्चल सेमिफाइनल पुगेको थियो । चैत ४ गते हुने फाइनलको विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् ।

प्रतियोगिता अवधिभर खेलाडी, रेफ्री, अफिसियलको दुर्घटना विमा एनएलजी इन्सुरेन्स कम्पनी लिमिटेडले गरेको छ । प्रतियोगितामा एन्फा, युवा तथाा खेलकुद मन्त्रालय, मध्यपश्चिमाञ्चल खेलकुद विकास समिति, बाँके जिल्ला खेलकुद विकास समितिको सहकार्य रहेको छ ।

टुबोर्ग नेपालगन्ज गोल्ड कपमा शनिबारको खेल
एपिएफविरुद्ध सिएमजी क्लब संकटा