काठमाडौं (हाम्रो खेलकुद) – एएफसी सोलिडारिटी कप जितेयता नेपाल फिफा वरियतामा लगातार माथि उक्लिने क्रम जारी रहेको छ ।अन्तर्राष्ट्रिय फुटबल संघले सार्वजनिक गरेको बिहीबारको वरियतामा नेपाल ३ स्थान माथि उक्लदै १ सय ७० औं स्थानमा पुगेको छ । फिफाले यो मार्च महिनाका लागि जारी गरेको वरियता हो । फेब्रुअरीमा नेपाल १ सय ७३ औं स्थानमा थियो ।

नेपालले कात्तिकको अन्तिममा मलेसियाको कुचिङमा आयोजित सोलिडारिटी कप जितेको थियो । त्यो नेपालले प्राप्त गरेको अहिले सम्मकै ठूलो उपाधि हो । नेपालले एसियाली फुटबल महासंघ (एएफसी) को आधिकारिक प्रतियोगिता जितेको पनि त्यो पहिलो नै थियो । वरियताक्रममा लगातार सुधार गरेपनि नेपाल दक्षिण एसियाली राष्ट्रमध्ये अझै चौथो स्थानमा छ ।

नेपालभन्दा अगाडि भारत,अफगानिस्तान र माल्दिभ्स छन् । त्यस्तै नेपालभन्दा पछाडि भुटान, बंगलादेश, श्रीलंका र पाकिस्तान छन् । २ स्थान तल झर्दै १ सय २४ औं स्थानमा रहेको भारत दक्षिण एसियाली राष्ट्रमध्ये शीर्षस्थानमा रहेको छ । अफगानिस्तान १ सय ५६ औं, माल्दिभ्स १ सय ४० औं स्थानमा छ । त्यस्तै भुटान १ सय ७७, बंगलादेश १ सय ९७ औं र पाकिस्तान १ सय ९८ औं स्थानमा छ ।

एसिया कप छनोट खेल्ने तयारीमा रहेको नेपालले फिलिपिन्ससँग हुने पहिलो लेग जितेमा फिफा वरियतामा अझै सुधार हुन सक्छ । नेपाल र फिलिपिन्सबीच चैत १५ गते पहिलो लेग फिलिपिन्समा हुँदैछ । अहिले नेपाली टोली बन्द प्रशिक्षणमा रहेको छ । फिफा वरियतामा अर्जेन्टिना शीर्षस्थानमा , ब्राजिल दोस्रो स्थानमा यथावत छन् । त्यस्तै विश्व कप विजेता जर्मनी तेस्रो, चिली चौथो र बेल्जियम पाँचौं स्थानमा छ ।