बार्सिलोना (एजेन्सी) – अन्तिम ८ मिनेटमा ३ गोल गरेपछि पहिलो लेगमा ४–० ले पछि परेको स्थितिलाई उल्टाउँदै बार्सिलोनो च्याम्पियन्स लिगको क्वार्टरफाइनलमा पुगेको छ । घरेलु मैदान क्याम्प नोउमा गए राती पेरिस सेन्ट जर्मेन( पिएसजी) लाई ६–१ ले हर्रापछि बार्सिलोना समग्रमा ६–५ को अग्रतासहित अन्तिम आठमा पुगेको हो ।

खेलको अन्तिम ८ मिनेटमा टोलीले ३ गोल गरेपछि बार्सिलोनाले अप्रत्याशित नतिजा निकालेको थियो । ८८औं मिनेटमा नेयमारले फ्रिकिकमार्फत उत्कृष्ट गोल गरे । इन्जुरी समयको पहिलो मिनेटमा मार्किन्होसले बक्सभित्र लुइस स्वारेजलाई फाउ हानेपछि प्राप्त पेनाल्टीलाई स्वारेजले गोलमा परिणत गरे ।

खेलको अन्तिम २ मिनेट बार्साको गोलरक्षक टेर स्टेगन पनि आक्रमणमा पुगेका थिए। वैकल्पिक खेलाडी सर्जी रोबर्टोले नेयमारको उत्कृष्ट पासलाई इन्जुरी समयको पाँचौं मिनेटमा गोल गरेपछि बार्सिलोनाले अघिल्लो चरण यात्रा निश्चित भएको थियो ।

त्यसअघि खेलको तेश्रो मिनेटमा लुइस स्वारेजको गोलबाट अग्रता लिएको बार्साका लागि ४०औं मिनेटमा पिएसजीका डिफेन्डर लेभिन कुर्जावाले आत्मघाती गोल गरेका थिए । दोश्रो हाफको सुरुवातमा लियोनल मेस्सीले गोल गर्दै बार्सालाई ३–० ले अघि बढाए।तर, एडिन्सन कभानीले ६२औं मिनेटमा गोल गरेपछि पिएसजी समग्रमा ५–३ ले अघि रहेको थियो ।

खेलको अन्त्य तिर बार्सिलोनाको च्याम्पियन्स लिग यात्रा पनि टुंगिने सम्भावना देखिएको थियो । तर, खेलले अन्त्यतिर खेलले नाटकिय मोड लियो र बार्सिलोनाले अघिल्लो चरणको यात्रा तय गर्यो ।

अर्को खेलमा बेनफिकालाई ४–० ले हराएपछि समग्रमा ४–१ को अग्रतासहित जर्मन क्लब बोरुसिया डर्टमन्ड पनि च्याम्पियन्स लिगको अन्तिम आठमा पुगेको छ ।