सौरभ गिरी
नेपालगन्ज – टुबोर्ग दोश्रो नेपालगन्ज गोल्ड कप फुटबल प्रतियोगिताको सबै तयारी पुरा भएको आयोजक जिल्ला फुटबल संघले जनाएको छ । नेपालगन्ज रंगशालामा बिहीबार सुरु हुने प्रतियोगितााका लागि टोली आउने क्रम सुरु भएको संघका अध्यक्ष भोजराज शाहीले बुधबार आयोजित पत्रकार सम्मेलनमा जानकारी दिए । उद्घाटन खेल साविक विजेता सुदूरपश्चिम ११ र भारतको दिल्ली युनाइटेडबीच हुनेछ । प्रतियोगितामा ८ टोलीको सहभागिता रहेको छ ।

प्रतियोगिताको विजेताले उपाधिसहित ५ लाख ,दोश्रो हुनेले २ लाख ५१ हजार रुपैया प्राप्त गर्नेछन् । प्रत्येक खेलको म्यान अफ द म्याचले एक थान लेनोभो मोबाइल प्राप्त गर्नेछन् । त्यस्तै प्रतियोगिताका उत्कृष्ट गोलकिपर ,उत्कृष्ट रक्षक , उत्कृष्ट मिडफिल्डर, उच्च गोलकर्ता र उत्कृष्ट स्ट्राइकरले समान ५ हजार रुपैयाँ प्राप्त गर्नेछन् ।

प्रतियोगिता अवधिभर एनएलजी इन्सुरेंसले खेलाडी र अफिसियलको विमा गरेको छ । प्रत्येक दिन खेल हेर्न टिकट लिएका ५ जोडीलाइ क्युएफएक्स सिनेमाको टिकट समेत उपलब्ध गराउने आयोजकले जनाएको छ । प्रतियोगिता अवधिभर अन्तराष्ट्रिय खेलाडीहरु लगायत ६५ बर्ष माथि उमेर पुगेका दर्शकहरुलाई खेल हेर्न निशुल्क ब्यबस्था गरिएको अध्यक्ष शाहीले जनाएका छन् ।
पत्रकार सम्मेलनमा अखिल नेपाल फुटबल संघ (एन्फा) केन्द्रिय सदस्य प्रदेश सिंह राठौर , मध्य पश्चिम क्षेत्रिय खेलकुद विकास समतिका अध्यक्ष भिम ओली, दिल्ली दिल्ली युनाइटेडका कप्तान डन लेप्चा, सुदुर पश्चिम ११ का व्यवस्थापक सुरेश हमाल र खेलाडीहरुको उपस्थिति थियो । प्रतियोगिताको उद्घाटन एन्फा अध्यक्ष नरेन्द्र श्रेष्ठले गर्ने बताइएको छ ।