नेपालगञ्ज (हाम्रो खेलकुद)– सुदूरपश्चिमाञ्चल ११ ले टुबोर्ग दोस्रो नेपालगञ्ज गोल्डकपको उपाधि रक्षा यात्रा भारतको दिल्ली युनाइटेडविरुद्ध खेल्दै सुरुआत गर्ने भएको छ । समूह ए अन्तर्गत सदूरपश्चिम र दिल्ली युनाइटेडको उद्घाटन खेल बिहीबार नेपालगञ्ज रंगशालामा हुनेछ । उक्त समूहमा रहेका सिएजमी क्लब संकटा र नेपाल एपिएफ क्लबबीच भने फागुन २८ गते प्रतिस्पर्धा हुनेछ ।

फागुन २७ गते हुने समूह खको पहिलो खेलमा नेपाल पुलिस क्लब र आयोजक नेपालगञ्ज ११ बीच शुक्रबार प्रतिस्पर्धा हुनेछ । भर्खर बंगलादेशमा सम्पन्न शेख कमल अन्तर्राष्ट्रिय क्लब कपमा सेमिफाइन पुगेको लक्ष्मी हुन्डाई मनाङ मस्र्याङ्दीले चैत २९ गते अग्नी रुपन्देही ११ को सामना गर्नेछ ।

मनाङ र रुपन्देही ११ को विजेताले पुलिस र नेपालगञ्जबीचको विजेतासँग चैत १ मा दोस्रो सेमिफाइनल हुनेछ । त्यसको अघिल्लो दिन चैत ३० गते समूह कको सेमिफाइनल हुनेछ । सुदूरपश्चिमाञ्चल र दिल्लीमध्ये एक तथा संकटा र एपिएफमध्ये एकले सेमिफाइनल खेल्नेछन् ।

चैत ३ गते हुने फाइनलको विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् । प्रतियोगिता अवधिभर खेलाडी, रेफ्री, अफिसियलको दुर्घटना विमा एनएलजी इन्सुरेन्स कम्पनी लिमिटेडले गरेको छ ।

प्रतियोगितामा एन्फा, युवा तथाा खेलकुद मन्त्रालय, मध्यपश्चिमाञ्चल खेलकुद विकास समिति, बाँके जिल्ला खेलकुद विकास समितिको सहकार्य रहेको छ । नेपालगञ्ज रंगशालामा हुने प्रतियोगिताको क्वार्टरफाइनल खेलेको टिकटदर १ सय तथा सेमिफाइनल र फाइनलको टिकटदर २ सय तोकिएको संघले जनाएको छ ।