काठमाडौं (हाम्रो खेलकुद) – लक्ष्मी हुन्डाई मनाङ मस्र्याङ्दी क्लबले बंगलादेशको शेख कमल अन्तर्राष्ट्रिय क्लब कप खेल्दाका १० खेलाडी विना पनि बिहीबारबाट नेपालगञ्जमा सुरु हुने टुबोर्ग दोस्रो नेपालगञ्ज गोल्डकपमा भाग लिने पक्का भएको छ ।

बंगलादेशबाट फर्के लगत्तै शेख कमल खेलेका १० खेलाडी राष्ट्रिय टोलीको प्रशिक्षणमा सामेल भइसकेको छन् । शेख कमल कप्तान अनिल गुरुङ, सुजल श्रेष्ठ, रोहित चन्द, विराज महर्जन, विशाल श्रेष्ठ, कमल श्रेष्ठ, हेमन्त थापामगर, विमल बस्नेत, विक्रम लामा र देवेन्द्र तामाङले खेलेका थिए । विक्रम र देवेन्द्रबाहेक ८ मनाङका आफ्नै खेलाडी हुन् । शेख कमलमा मनाङ सेमिफाइनल पुगेको थियो । राष्ट्रिय टोलीका गोलकिपर किरण चेम्जोङको माल्दिभ्स टोली टिसी स्पोर्टस्सँग मनाङ सेमिफाइनलमा पराजित भएको थियो । टिसीले शेख कमल उपाधि जितेको थियो ।

‘मनाङ आउने पक्का छ’ आयोजक बाँके जिल्ला फुटबल संघका अध्यक्ष भोजराज शाहीले भने । एन्फा बाँकेले आइतबार पत्रकार सम्मेलनमार्फत भाग लिने ८ टोलीको नाम सार्वजनिक गरेपनि त्यसमा एउटा टोली फेरवदल भएको शाहीले बताए । यसअघि नआउने भनेको भारतको दिल्ली युनाइटेड आउने भएको छ भने त्रिभुवन आर्मी क्लबले नाम फिर्ता लिएको छ । अब दिल्ली युनाइटेड, मनाङ, सिएमजी क्लब संकटा, नेपाल पुलिस, नेपाल एपिएफ क्लब, आयोजक नेपालगञ्ज ११, अग्नी रुपन्देही ११, साविक विजेता सुदूरपश्चिम ११ ले प्रतियोगितामा प्रतिस्पर्धा गर्नेछन् ।

चैत ४ गते सम्म हुने टुबोर्ग नेपालगञ्ज गोल्डकपको विजेताले उपाधि सहित ५ लाख र दोस्रो हुने टोलीले २ लाख ५१ हजार रुपैयाँ प्राप्त गर्नेछन् । प्रतियोगिता अवधिभर खेलाडी, रेफ्री, अफिसियलको दुर्घटना विमा एनएलजी इन्सुरेन्स कम्पनी लिमिटेडले गरेको छ । प्रतियोगितामा एन्फा, युवा तथाा खेलकुद मन्त्रालय, मध्यपश्चिमाञ्चल खेलकुद विकास समिति, बाँके जिल्ला खेलकुद विकास समितिको सहकार्य रहेको छ । नेपालगञ्ज रंगशालामा हुने प्रतियोगिताको क्वार्टरफाइनल खेलेको टिकटदर १ सय तथा सेमिफाइनल र फाइनलको टिकटदर २ सय तोकिएको संघले जनाएको छ ।