बुटवल – नीराजन खड्का चम्केपछि सिएमजी क्लब संकटाले १९ औं तिलोत्तमा गोल्डकप फुटबल प्रतियोगिताको उपाधि जितेको छ ।

त्रिभुवन आर्मी क्लबसँग १–० ले पछि परेको खेल २–१ ले आफ्नो पक्षमा पार्दै संकटाले बर्षको तेस्रो नकआउट फुटबल प्रतियोगिताको उपाधि जितेको हो । संयोग तीनै उपाधि जित्दा संकटाले आर्मीलाई नै हराएको थियो । यसअघि चितवनको विकास रनिङ शिल्ड र गत महिना रुस्लान सिमरा गोल्ड फुटबल प्रतियोगिताको फाइनलमा पनि संकटाले आर्मीलाई हराएको थियो । योसँगै यो बर्ष घरेलु फुटबलका तीनवटा नकआउट प्रतियोगिता जित्ने संकटा तेस्रो क्लब बनेको छ । यसअघि त्रिभुवन आर्मी क्लब र लक्ष्मी हुन्डाई मनाङ मस्र्याङ्दीले पनि तीन वटा उपाधि जितेका थिए ।

देविनगरस्थित एन्फा टेक्निकल सेन्टरमा शनिबारको फाइनलमा संकटाका लागि दुवै गोल नीराजनले गरेका थिए । निराजनले खेल सकिन ५ मिनेट बाँकी रहँदा नीराजनले निर्णायक गोल गरेका थिए ।

त्यसअघि उनले पहिलो हाफको इन्जुरी समयको पहिलो मिनेटमा बराबरी गोल गरेका थिए । ३० औं मिनेटमा राजीव गुरुङले गोल गर्दैै आर्मीलाई अघि बढाएका थिए । तर, इन्जुरी समयको पहिलो मिनेटमा नीराजन खड्काले गोल फर्काउँदै खेललाई बरारीमा पुर्याएका थिए ।

रुपन्देही जिल्ला फुटबल संघको आयोजनामा फागुन १२ गतेदेखि सुरु भएको प्रतियोगितामा भारतका दुई टोलीसहित १० टोलीको सहभागिता थियो ।

मोसफलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्र्यो । गत बर्षबाट प्रतियोगिताले पुनः निरन्तरता पाएको छ । यसपटक प्रतियोगितालाई अग्नी सिमेन्टले मुख्य प्रायोजन गरेको छ ।

बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् । त्यस्तै अखिल नेपाल फुटबल सघं (एन्फा), राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् ।