काठमाडौँ (हाम्रो खेलकुद) – रोयल केसिटिसी इन्डोर क्रिकेटको आयोजनामा गत शुक्रबारदेखि जारी कर्पोरेट क्ल्यास २०१७को  फाइनल खेलमा सिटिजन्स बैंक र आईसीएफसी भिड्ने भएका छन्।

आज भएको पहिलो सेमिफाइनल खेलमा सिटिजन्स बैंकले बैंक अफ काठमाडौँ लुम्बिनीलाई २२ रनले पराजित गरेको थियो। पहिलो ब्याटिङ गरेको सिटिजन्सले निर्धारित १२ ओभरमा ३ विकेट गुमाउदै ९४ रन जोडेको थियो। ओपनर सुमन पोखरेलले ४० बलमा ७ छक्काको मद्दतले ६४ रन बनाएका थिए।

९५ रनको लक्ष्य पछ्याएको बिओकेएल भने ११.१ ओभरमा अलआउट भयो। उसका लागि ओपनर द्वय प्रमथ शाह (२०) र किरण थापा (१४) बाहेक अन्य ब्याट्सम्यानले दोहोरो अंक बनाउन सकेनन्। विजयी टोलीका लागि आक्रामक ब्याटिङ गरेका सुमन पोखरेलले बलिङमा पनि एक विकेट लिदै म्यान अफ द म्याच घोषित भएका थिए।

दिनको दोश्रो सेमीफाइनलमा पनि पहिलो ब्याटिङ गर्ने टोली विजय हासिल गर्दै फाइनल पुगेको थियो। निर्धारित १२ ओभरमा अलआउट हुदै ८५ रन जोडेको आईसीएफसीले माछापुच्छ्रे बैंकलाइ ५७ रनमा रोक्दै २८ रन्को विजय हासिल गर्यो। आइसीएफसी समिर क्षेत्रीले दोश्रो इनिङमा ३-०-३-३को उत्कृष्ट बलिङ प्रदर्शन गरेपछि जित सम्भव भएको थियो। ब्याटिङमा पनि १४ रनको महत्वपूर्ण योगदान दिएका समिर खेलको म्यान अफ द म्याच भए।

प्रतियोगिताको फाइनल खेल आइतबार दिनको ३:०० बजे गल्फुटार स्थित रोयल केसिटिसी इन्डोरमा हुनेछ।