प्रकाश तिमल्सिना

काठमाडौं – माल्दिभ्सको टिसी स्पोर्टस्को पोष्ट सम्हाल्दै नेपाली राष्ट्रिय फुटबल टोलीका गोलकिपर किरण चेम्जोङले बंगलादेशमा जारी शेख कमाल अन्तर्राष्ट्रिय क्लब कपको लक्ष्मी हुन्डाई मनाङ मस्याङ्दीविरुद्धको सेमिफाइनलमा आफु दबाबबीच खेलको बताएका छन् ।

टिसी फुटबल क्लबका प्रशिक्षकका साथ गोलकिपर किरण ।

फागुन १६ भएको सेमिफाइनलमा किरणको पूर्व क्लब मनाङलाई हराउँदै १–० टिसी स्पोर्टस् फाइनल पुगेको थियो । आज साझ किरणको टोली र कोरियाली क्लबीच फाइनल हुँदैछ । ‘पूर्व क्लबविरुद्ध खेल्नु पर्ने भएकोले मलाई एक खालको दबाब थियो । क्लबका अफिसियलहरुले खुलेर नभने पनि शंकाको नजरमा हरेका थिए । त्यसबाट पनि म माथि दबाब थियो’ किरणले हाम्रो खेलकुदसँग भने, ‘तर हामी व्यवसायिक फुटबल भावनाको धेरै ठूलो अर्थ हुन्न । जुन क्लबबाट खेलिन्छ त्यो समय त्यसैमा प्रतिबद्ध रहनुपर्छ । मैले त्यहि गरे । सोचे जस्तै खेले । आउने दिनका लागि पनि त्यो प्रदर्शनले राम्रो गर्यो भन्ने लाग्छ ।’

किरणले मनाङका निश्चित दुई गोल बचाएका थिए । दोस्रो हाफको सुरुआततिर रोहित चन्दको हेडर अन्त्यतिर ओलाडिपो ओलावाले अफिजले नजिकबाट गरेको प्रहारलाई रोक्दै किरणले टोलीको अग्रतालाई जोगाइ राखे र टोली फाइनल पुग्यो । किरण सेमिफाइनलमा म्यान अफ दी म्याच पनि बनेका थिए । दबाबका बीच पनि राम्रो खेल्न सजिलो थियो त भन्ने प्रश्नमा उनको जवाफ थियो ‘सहज थिएन । तर खेल्दा खेल्दा अनुभवले खारिदै लाने रहेछ । खेल जीवनको प्रारम्भमा अलि जोश हुन्थ्यो, हतारिदा गल्ति पनि हुन्थ्यो । अब धेरै खेल्दा खेल्दै ‘कुल’ भइयो जस्तो लाग्छ । अनुभवको काम आउँछ भन्नेको सायद यस्तै होला । अब केही परिपक्वता पनि आएजस्तो लाग्छ ।’ उनले रोहित र आफिज दुवैको प्रहार रोक्नु सक्नु ‘पोजिसन’ मा हुनुनै मुख्य कारण भएको बताए । ‘दुवै जनाको प्रहार उत्कृष्ट थियो,’ उनले स्मरण गरे,‘संयोगले म पोजिसनमा थिए, अलि कतिपनि दायाँ बायाँ हुन्थ्यो भने सायद गोल हुन्थ्यो । फुटबलमा पोजिसन र टाइमिङको महत्वपूर्ण हुन्छ ।’

किरण पुसको अन्त्यमा माल्दिभ्स जानुअघि मनाङबाटै फुटबल खेल्थे । उनी लामो समय रुस्लान थ्री स्टारमा आबद्ध थिए । गत बर्षमा उनी थ्री स्टारबाट मनाङ पुगेका थिए । नेपालका नम्बर एक गोलकिपर किरणले मनाङविरुद्धको खेलमात्र होइन पटक पटक आफुलाई राष्ट्रिय टोलीबाट पनि प्रमाणित गरिसकेका छन् । कात्तिक अन्तिममा मलेसियामा भएको एएफसी सोलिडारिटी कप जित्दा उच्च प्रदर्शन गर्नेमध्ये किरण पनि एक थिए ।

सोलिडारिटी कपमा लाउस विरुद्धको टाइब्रेकरमा उनीले दुई वटा पेनाल्टी रोकेका थिए । फाइनलमा सुजल श्रेष्ठको गोलमा मकाउलाई १–० ले हराएर सोलिडारिटी कप च्याम्पियन बनेर फर्केको थियो ।