काठमाडौं (हाम्रो खेलकुद) – राष्ट्रिय फुटबल टोलीका गोलकिपर किरण चेम्जोङको माल्दिभियन क्लब टिसी स्पोर्टसले बंगलादेशमा जारी शेख कमाल अन्तर्राष्ट्रिय क्लब कपको फाइनलमा कोरियाको पोचेओन सिटिजन एफसीको सामना गर्ने भएको छ ।

चितोगोङमा बुधबार साँझ भएको खेलमा आयोजक चितोगोङ अवहानी लिमिटेडलाई २–१ ले हराउँदै पाचेओन उपाधि नजिक पुगेको हो । १–० ले पछि परेको खेल उल्टाउँदै कोरियाली क्लब फाइनल पुगेको हो । कोरियन क्लब र आयोजकको सेमिफाइनल हेरेका किरणले फाइनल रोमाञ्चक हुने आशा व्यक्त गरे ।

अवहानीले अग्रता लिएर पनि जोगाउन सकेन, कोरियन क्लब अली भाग्यशाली पनि रह्यो, अन्तिम तिर गोल गर्दै फाइनल पुगेको हो । किरणको टिसी स्पोर्टस् र पोचेओन समूह चरणमा एउटै समूहमा थिए । जहाँ त्यो खेल १–१ को बराबरीमा टुंगिएपछि टिसी स्पोर्टस् समूह विजेता र कोरियन क्लब उपविजेताका रुपमा अन्तिम चारमा पुगेका थिए ।

किरणको उच्च प्रदर्शनबाट प्रेरित टिसी स्पोर्टस् लक्ष्मी हुन्डाई मनाङ मस्र्याङ्दीलाई १–० ले हराउँदै फाइनल पुगेको थियो । मनाङविरुद्धको खेलमा म्यान अफ दी म्याच बनेका किरणले दुईवटा निश्चित गोल रोकेका थिए । किरणले कोरियाली टोली प्राविधिक रुपमा स्तरीय रहेको बताए । ‘यो प्रतियोगितामा सबै राम्रो टोलीले भाग लिएका थिए ’ किरणले भने, ‘त्यसमा पनि कोरियाको तेस्रो डिभिजनको टोली भएपनि पोचेओन टेक्निकल्ली राम्रो छ । ’

उनले फाइनलका लागि आफुहरु तयार रहेको समेत बताए । ‘राम्रो टिमसँग खेल्न म जहिले उत्साहित हुन्छु’ उनले थपे, ‘प्रतिस्पर्धात्मक खेलले आफुलाई थप परिपक्व बनाउन मद्दत पुग्छ ।’ टिसी स्पोर्टस र कोरियन क्लबबीच शुक्रबार साँझ फाइनल हुनेछ ।