बार्सिलोना (एजेन्सी)– लुइस इन्रिकेको बार्सिलोनालाई घरेलु मैदानमा लगातार पाँचौं जित दिलाउने क्रममा स्टारत्रय लुइस स्वारेज, लियोन मेस्सी र नेमारले गोल गरेका छन् । स्पेनिस ला लिगाअन्तर्गत गए राती क्याम्प नोउमा स्पोर्टिङ गिजोनमाथि ६–१ को जित निकाल्दै बार्सिलोनाले उपाधि दौडलाई मजबुद बनाउँदै लगेको छ ।

बार्सिलोनाले सहज जित निकालेको केही घन्टापछि उपाधि दौडको मुख्य प्रतिस्पर्धी रियल मेड्रिड लास पाल्माससँग ३–३ को बराबरीमा रोकिएको थियो । जसका कारण बार्सिलोना ५७ अंकसहित शीर्षस्थानमा रहन सफल हुँदा १ अंक कम भएको रियल दोस्रो स्थानमा छ । यद्दपी बार्सिलोनाले २५ खेल खेलिसक्दा रियलले एक खेल कम खेलेको छ ।

मेस्सीले पहिलो गोल गरेको खेलमा बार्सिलोनाले पहिलो हाफमै ३–१ को अग्रता बनाएको थियो । मेस्सीले नौं मिनेटमा गोल गरे भने त्यसको दुई मिनेटपछि नै हुवा रोड्रिग्युजको आत्मघाती गोल गरे । २१ औं मिनेटमा कार्लोस कास्ट्रोले गोल फर्काएपनि स्वारेजले २७ औं मिनेटमा गोल थपे ।

४९ औं मिनेटमा फ्रान्सिस्को अल्सासेरले र ६५ औं मिनेटमा नेमारले गोल गरे । खेल सकिन ३ मिनेट बाँकी रहँदा इभान राकिटिकले अर्को गोल थपेपछि जित सह जबनेको थियो । घरेलु मैदानमा लगातार पाँच खेल जित्नु बार्सिलोनाका लागि यो सिजनको उच्च प्रदर्शन हो ।

ला लिगाका अन्य खेलमा भिल्लारियलले ओसासुनालाई ४–१ ले, ग्रानाडाले अल्भेसलाई २–१ ले हराउँदा सेल्टा भिगो र इस्पानुयलले २–२ को बराबरी खेलेका छन् ।