दीपक न्यौपाने
बुटवल – सिएजमी क्लब संकटा लगातार दोस्रो साता नकआउट फुटबल प्रतियोगिताको फाइनल पुगेको छ । इन्जुरी समयमा सुशील केसीले निर्णायक गोल गरेपछि हिमालयन शर्पालाई बुधबार २–१ ले हराउँदै संकटा १९ औं तिलोत्तमा गोल्ड कप फुटबल प्रतियोगिताको उपाधि नजिक पुगेको छ ।

संकटाले त्रिभुवन आर्मी र आयोजक अग्नी रुपन्देहीको विजेतासँग शनिबार फाइनल खेल्नेछ । गत साता संकटाले धरानमा १९ औं बुढासुब्बा गोल्ड कप फुटबल प्रतियोगिताको फाइनल खेलेको थियो ।  देविनगरस्थित एन्फा टेक्निकल सेन्टरमा खेलमा अग्रता भने हिमालयन शेर्पाले लिएको थियो ।

चेतनकुमार थारुले २६ औं मिनेटमा गोल गर्दै हिमालयनलाई अघि बढाएका थिए । तर, पहिलो हाफको लागि दुई मिनेट बाँकी रहँदा मार्टिन्सले बराबरी गोल गर्दै रुस्लान आठौं सिमरा गोल्ड कप फुटबल प्रतियोगिताका विजेता संकटालाई खेलमा फर्काएका थिए । बराबरीतर्फ उन्मुख खेलमा ४ मिनेट थपिएको इन्जुरी समयको दोस्रो मिनेटमा सुशीलले विजयी गोल गरेका थिए ।

दुवै टोली लगातार मोफसलका नकआउटमा सहभागिता जनाउँदै आइरहेका छन् । दुई साताअघि रुस्लान सिमरा गोल्डकप फुटबल प्रतियोगिताको उपाधि जितेको संकटाले गत साता धरानमा १९ औं बुढासुब्बा रेडबुल गोल्डकप फुटबल प्रतियोगिताको फाइनल खेलेको थियो ।

संकटाले माघको पहिलो साता सुदूरपश्चिमाञ्चल खप्तड गोल्डकपको पनि फाइनल खेलेको थियो । तर, झन्डै दुई बर्षपछि घरेलु फुटबलमा फर्केको हिमालयन शेर्पा सेमिफाइनल भन्दा अघि बढ्न सकेको छैन । सिमरा गोल्डकप, उदयपुर गोल्डकप दुवैमा शेर्पा सेमिफाइनलमै रोकिएको थियो । संकटा पनि उदयपुरमा सेमिफाइनलबाट अघि बढ्न सकेको थिएन ।

रुपन्देही जिल्ला फुटबल संघको आयोजनामा सञ्चालित मोफसलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्र्यो । गत बर्ष भने प्रतियोगिताले पुनः निरन्तरता पाएको छ ।

यसपटक प्रतियोगितालाई अग्नी सिमेन्टले मुख्य प्रायोजन गरेको छ । बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् । त्यस्तै एन्फा, राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।

तिलोत्तमा गोल्ड कपमा बिहीबारको सेमिफाइनलमा
आर्मीविरुद्ध अग्नी रुपन्देही