काठमाडौं (हाम्रो खेलकुद)- तेस्रो नेपाल सुपर लिग (एनएसएल) को फाइनलमा अहिले साविक विजेता ललितपुर सिटी एफसी र सामना पहिलो पटक फाइनलमा पुगेको पोखरा थन्डर्सबीच खेल जारी छ।

पहिलो हाफमा पापा इबाउ केबेको गोलमा ललितपुरले १-० को अग्रता बनाएको छ। दशरथ रंगशालामा आज एनसेलको सबैभन्दा बढी दर्शकको उपस्थिति रहेको छ।

तुलनात्मक रूपमा पहिलो हाफमा पोखराले बढी मौका सिर्जना गर्यो। तर ललितपुर गोल गर्न सफल रह्यो।खेलको १४ औं मिनेटमा पापा इबाउ केबेको प्रहार क्रसबार माथीबाट बाहिरियो।

२३ औं मिनेटमा पोखराका सुदिल राईको क्रस ललितपुरका डिफेन्डरलाई लागेर रिबाउन्डमा आएको बललाई कप्तान आयुष घलानले बकमस बाहिरबाट हानेको प्रहारले सही दिशा लिन सकेन।

२७ औं मिनेटमा पोखरा फेरि चुक्यो। जो आइडोको फ्रि-किकमा स्टेफन समिर बिनोङको पावरफुल सट पोष्ट नजिकैबाट बाहिरियो।

३४ औं मिनेटमा आयुष घलानले दिएको थ्रु-पासमा स्ट्राइकर बिनोङले प्रहार गर्नपर्ने बललाई कन्ट्रोल गर्न खोजे। ललितपुरका कप्तान तथा डिफेन्डर अनन्त तामाङले सो बललाई क्लियर गरिदिए।

पोखराको निरन्तरको प्रयास सफल हुन सकेन्। यता ललितपुरले ४२ औं मिनेटमा अग्रता बनायो। मनोज राईको क्रसलाई होलकिपर प्रिसोले जम्प गरेर पन्च गर्न खोजे। तर उनी सफल नहुँदा पापा इबाउ केबेको हेडरले सही दिशा लियो। पहिलो हाफमा ललितपुरले १-० को अग्रता बनायो।

ललितपुर एनएसएलमा नै १० खेलमा अपराजित छ। उत्कृष्ट लयमा रहेको ललितपुरलाई पहिलो हाफमा पोखराले चुनौती दिएको छ। पोखरा पछिल्लो ६ खेलमा अपराजित रहेको छ।

आजको विजेताले उपाधिसँगै ८० लाख र दोस्रो हुने टोलीले ३० लाख रुपैयाँ प्राप्त गर्नेछन्।