एजेन्सी – आर्दा गुलेरले एक मात्र गोल गर्दै रियल मड्रिडलाई गेटाफेमाथि जित दिलाएपछि ला लिगाको शीर्षस्थानमा बार्सिलोनासँगको दूरी ४ अंक पुन: ४ अंकमा झरेको छ।

गत साता च्याम्पियन्स लिगबाट आर्सनलसँग पराजित हुँदै बाहिरिएको रियल माथि यो सिजन केही उपलब्धि हासिल गर्ने दबाब छ । कार्लो एन्चेलोटी र उनका खेलाडीका लागि यो खेल जित्नैपर्ने थियो ‌। जसले केही हदसम्म दबाब कम गर्‍यो।

यो खेलमा जुड बेलिङ्घम बेन्चबाट सुरु भए भने एन्चेलोट्टीले शनिबार हुने कोपा डेल रे फाइनलको तयारीस्वरूप टोलीमा ६ खेलाडी परिवर्तन गरे। किलियन एमबाप्पे चोटका कारण टोलीमा थिएनन्।

२१औँ मिनेटमा गुलेरले काउन्टर अट्याकबाट गोल गरे । गेटाफेका गोलकिपर डेविड सोरियाले छोए तापनि रोक्न सकेनन्।

एन्ड्रिकले आफ्नो पहिलो ला लिगा सुरुवातमा गोल गर्ने मौका पाए पनि सफल भएन । भिनिसियस जुनियरले उनलाई एक्लै गोलकिपर सामना गर्न पास दिएका थिए । तर ड्जेने डाकोनामले लाइनबाट बल क्लियर गरे।

इन्ज्युरी समयको छैठौँ मिनेटमा गेटाफेले बराबरी गर्ने मौका पाए, तर रोड्रिग्वेजको प्रयासलाई थिबाउ कोर्ट्वाले उत्कृष्ट बचाउ गर्दै रियललाई जित दिलाए।

यो जितसँगै ३३ खेलमा ७२ अंक जोडेको रियलको भन्दा शीर्षस्थानको बार्सिलोनाको‌ ४ अंक बढी छ । ला लिगामा अब पाँच खेल मात्र बाँकी छन्। बार्सिलोना र रियलबीचको एल क्लासिको मे ११ मा हुनेछ। गेटाफे १२औँ स्थानमै कायम छ।

अन्य खेलमा सेल्टा भिगोले भिल्लारियललाई ३-० ले, एथलेटिक क्लबले लस पालमसलाई र अल्भेसले रियल सोसिडाडलाई‌ समान १-० ले हराएको छ।