नेपालगञ्ज (हाम्रो खेलकुद)- एपिएफ फुटबल क्लब
नेपालगन्ज रंगशालामा जारी अन्तराष्ट्रिय आमन्त्रण लुम्बिनी कप महिला फुटबल प्रतियोगिताको सेमिफाइनल पुगेको छ।

अन्तिम क्वाटर फाइनल खेलमा आज कर्णाली प्रदेश प्रदेश फुटबल संघलाफ ६-० ले हराउँदै एपिएफ अन्तिम चारमा पुगेको हो।

खेलको १८ औं मिनेटमा कर्णालीकी टिना रावतको आत्मघाती गोलबाट एपिएफले अग्रता लियो । ३५ औं मिनेटमा एपिएफकी रेनुका नगरकोटेले गोल गरिन् ।

त्यसको एक मिनेटपछि अनिता केसीले गोल गरिन् । ४५ औं मिनेटमा गिता रानाले गरेपछि एपिएफले पहिलो हाफमा ४-० को अग्रता बनायो।

४६ औं मिनेटमा रश्मि कुमारी घिसिङले गोल गरिन् । ५० औं मिनेटमा कर्णालीकी टिनाबाट अर्को आत्मघाती गोल भएपछि एपिएफले फराकिलो जित दर्ता गर्यो।

सोही खेलबाट गोलकिपर अञ्जना रानामगरले एपिएफबाट डेब्यू गरिन्  । अर्को विभागीय टोली त्रिभुवन आर्मी क्लब छाडेर उनी दुई साता अघि एपिएफमा आबद्ध भएकी हुन् । दोस्रो हाफमा अञ्जनाको सट्टा सावित्री किशनले पोस्ट सम्हालेकी थिइन्।

एपिएफकी रेनुका प्लेयर अफ दि म्याच घोषित भइन् ।उनलाई राष्ट्रिय महिला फुटबल टोलीका प्रशिक्षक राजेन्द्र तामाङ, खेल प्रायोजक राजा खानका प्रतिनिधि सादाब खान र मनमाया मेमोरीयल फिजियोथेरापीका डाक्टर खेमा भण्डारीले ५ हजार रुपैयाँ हस्तान्तरण गरे ।

एपिएफले रौतहट जिल्ला फुटबल संघसँग सेमिफाइनल खेल्नेछ। पहिलो सेमिफाइनलमा मंगलवार नेपाल पुलिस क्लब र आर्मीबीच प्रतिस्पर्धा हुनेछ।