एजेन्सी – राफिन्हाले इन्ज्युरी समयमा पेनाल्टीमा गोल गरेपछि ला लिगाको शीर्ष टोली बार्सिलोनाले सेल्टा भिगोमाथि ४-३ को रोमाञ्चक जित निकालेको छ ।

डानी ओल्मोलाई पेनाल्टी बक्स भित्र लडाइएको ठहर गर्दै पेनाल्टी दिइएको थियो । इन्ज्युरी समयको आठौं मिनेटमा त्यसलाई ब्राजिलियन फरवार्ड राफिन्हाले गोलमा परिणत गरे।

हान्सी फ्लिकको टोली बार्सिलोना ६२ औं मिनेटसम्म ३-१ ले पछि परेको थियो । १२ औं मिनेटमा फेरान टोरेसको गोलमा बार्सिलोनाले अग्रता लियो। १५ औं मिनेटमा बोर्‍हा इग्लेसियस बराबरी गोल गरे।

इग्लेसियसले ५२ औं र ६२ मिनेटमा गोल थपेर ह्याट्रिक पूरा गर्दै सेल्टालाई ३-१ ले अघि बढाए।

तर बार्सिलोनाले पुनः संगठित हुँदै दोस्रो हाफमा ४ मिनेट भित्र डानी ओल्मो र राफिन्हाले गोल गर्दै खेल बराबरीमा ल्याए । ओल्माले ६४ औं र राफिन्हाले ६८ औं मिनेटमा गोल गरे।

खेल बराबरीमा सकिने संकेत देखियो । तर अन्तिम समयमा ओल्मोलाई फाउल गरेको भिएआरबाट पुष्टि भएपछि बार्सिलोनाले पेनाल्टी पायो र राफिन्हाले गोल गरे।

३२ खेलमा ७३ अंक जोडेको बार्सिलोनाले एक खेल कम खेलेको दोस्रो स्थानको रियल म्याड्रिडलाई ७ अंकले पछि परेको छ। सेल्टा आठौं स्थानमा छ।

अर्को खेलमा लास पालामसले तेस्रो स्थानको एट्लेटिको म्याड्रिडलाई १-० ले हराएको छ।

अन्य खेलमा इस्पानियोलले गेटाफेलाई १-० ले पराजित गर्यो, रायो भालेसानो र भ्यालेन्सियाले १-१ तथा मालोर्का र लेगानेसले गोलरहित बराबरी खेलेका छन्।