नेपालगञ्ज (हाम्रो खेलकुद)- नेपाल पुलिस क्लब
नेपालगन्जमा जारी अन्तराष्ट्रिय आमन्त्रण लुम्बिनी कप महिला फुटबल प्रतियोगिताको सेमिफाइनलमा पुगेको छ।

नेपालगंज रंगशालामा शनिवार  भारतको सिलिगुढी एफसीलाई ४-० ले हराउँदै पुलिसले अन्तिम चारको यात्रा तय गर्यो।

पुलिसको जितमा निर्मला उपाध्यायले २, मिना देउवा र कप्तान निरु थापाले समान १ गोल गरिन् । सुमन सुवेदीको प्रशिक्षणमा रहेको पुलिसले सबै गोल पहिलो हाफमै गर्यो । खेलको १३औं मिनेटमा मिनाको गोलबाट पलिसले अग्रता बनायो ।

१८ औं मिनेटमा निर्मलाले गोल गरिन् । पुलिसको लागि दोस्रो गोल गरेकी  हुन् । २२ औं मिनेटमा पेनाल्टीमा पुलिसले तेस्रो गोल गर्यो । सिलिगुढीकी रक्षकले पेनाल्टी बक्सभित्र बल ह्यान्ड गरेपछि रेफ्री कृष्ण खत्रीले पुलिसलाई पेनाल्टी दिए।‌ पेनाल्टीमा निरुले गोल गरिन् । निर्मलाले ३०औं मिनेटमा व्यक्तिगत दोस्रो तथा टोलीको लागि चौथो गोल गरिन् ।

दोस्रो हाफमा भारतीय टोलीले सुधारिएको प्रर्दशन गरेपनि गोल गर्न सकेन । पुलिसकी स्ट्राइकर निर्मला प्लेयर अफ दि म्याच घोषित भइन् । निर्मलालाई शिक्षासेवी तथा आयोजक संस्था अन्तरालका सल्लाहकार लोकेन्द्र बहादुर शाह र रमादेवी शाहले ५ हजार नगद हस्तान्तरण गरेका थिए ।

पुलिसले  वैशाख ९ गते अर्काे विभागीय टोली त्रिभुवन आर्मी फुटबल क्लबसँग सेमिफाइनल खेल्नेछ । आर्मीले शुक्रवार सुदूरपश्चिम प्रदेश फुटबल संघलाई ४-० ले हराउँदै सेमिफाइनलको यात्रा तय गरेको हो ।

प्रतियोगितामा आइतवार बाँके फुटबल संघ र रौतहट जिल्ला फुटबल संघबीच तेस्रो क्वाटरफाइनल हुनेछ।