दिपक न्यौपाने
बुटबल – त्रिभुवन आर्मी क्लब अर्को विभागिय टोली नेपाल पुलिस क्लबलाई ३–१ ले पराजित गर्दै मंगलबार १९ औं तिलोत्तमा गोल्डकप फुटबल प्रतियोगिता सेमिफाइनलमा पुगेको छ । पहिलो हाफमै २–० को अग्रता बनाएको आर्मीले शनिबार १९ औं बुढासुब्बा रेडलबुल गोल्ड कप फुटबल प्रतियोगिताको विजेता पुलिसलाई सहजै पराजित गरेको थियो । आर्मीले फाइनल प्रवेशका लागि बिहीबार आयोजक अग्नी रुपन्देहीको सामना गर्नेछ ।

देविनगरस्थित एन्फा टेक्निकल सेन्टरमा विवेक बस्नेतको गोलबाट २० औं मिनेटमा अग्रता लिएको आर्मीका लागि अर्को गोल राजीव गुरुङले ३८ औं मिनेटमा गरेका थिए । पुलिसका निरकुमार राईले ७८ औं मिनेटमा गोल फर्काउँदै गोलअन्तर घटाएका थिए ।

तर खेल सकिन ७ मिनेट बाँकी रहाँ दीप लामाले गोल गरेपछि आर्मीको जित सहज बनेको थियो । आर्मीका विवेक खेलको म्यान अफ दी म्याच घोषित भए । राष्ट्रिय टोलीको प्रशिक्षकका कारण आर्मी फरवार्डद्वय भरत खवास र नवयुग श्रेष्ठविना उत्रेको थियो । प्रशिक्षणमा रहेपनि घुँडाको चोटका कारण नवयुग आराम गरिरहेका छन् ।

रुपन्देही जिल्ला फुटबल संघको आयोजनामा सञ्चालित मोफसलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गथ्र्यो । गत बर्ष भने प्रतियोगिताले पुनः निरन्तरता पाएको छ । यसपटक प्रतियोगितालाई अग्नी सिमेन्टले मुख्य प्रायोजन गरेको छ । बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् ।

त्यस्तै एन्फा, राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।

तिलोत्तमा गोल्डकपमा बुधबारको सेमिफाइनल
हिमालयन शेर्पाविरुद्ध संकटा