लेस्टर (एजेन्सी)– जेमी भार्डीले २ र डानी ड्रिंक वाटरले १ गोल गरेपछि मंगलबार लिभरपुललाई ३–१ ले हराउँदै लेस्टर सिटीले प्रिमियर लिगमा रेलिगेसन क्षेत्र छाडेको छ । क्लाडियो रानिरीको बर्खास्त पछि क्राइस साकेसपियरेको नेतृत्वमा लेस्टरले पहिलो खेलमै सफलता प्राप्त गरेको छ । २०१७ मा लेस्टरको यो दोस्रो जित हो ।

भार्डीले २८ औं मिनेटमा गोल गर्दै लेस्टरलाई अग्रता दिलाएका थिए । साविक विजेताका लागि ड्रिंकवाटरले ३९ औं मिनेटमा झन्डै २५ यार्डबाट गोल गरे । त्यस्तै क्रिस्टियन फाउचको क्रसमा भार्डीले दोस्रो हाफमा तीन गोल गरेका थिए ।

६८ औं मिनेटमा लिभरपुलका लागि फिलिप काउटिन्होले गोल फर्काएका थिए । मंगलबारको जितसँगै लेस्टरले लगातार पाँचौं हारबाट जोगिएको छ । जितपछि लेस्टर १५ औं स्थानमा उक्लेको छ । रेलिसेसनमा क्षेत्रमा रहेको टोलीको भन्दा लेस्टरको २ अंक बढी भएको छ । हारका वावजुद लिभरपुल पाँचौ स्थानमा यथावत छ ।

चौथो स्थानको आर्सनलको भन्दा १ अंक कम रहेको लिभरपुलले छैटौं स्थानको म्यानचेस्टर युनाइटेडलाई अझै १ अंकले पछि पारेको छ । लिभरपुलभन्दा आर्सनल र युनाइटेडले एक खेल कम खेलेका छन् । ६३ अंकसहित चेल्सी शीर्षस्थानमा छ भने १० अंक कम रहेको टोटेनह्याम दोस्रो स्थानमा छ । तेस्रो स्थानको सिटीको ५२ र आर्सनलको ५० अंक छ ।