चितोगोङ (हाम्रो खेलकुद)– लक्ष्मी हुन्डाई मनाङ मस्र्याङ्दी क्लबलाई हराउँदै नेपाली राष्ट्रिय टोलीका गोलकिपर किरण चेम्जोङ सम्मिलित माल्दिभ्सको टिसी स्पोर्टस क्लब बंगलादेशमा जारी शेख कमल अन्तर्राष्ट्रिय क्लब कपको फाइनलमा पुगेको छ।

मनाङलाई सोमबार साँझ १–० ले हराउँदै टिसी स्पोर्टस् उपाधि नजिक पुगेको हो । मनाङका गोलकिपर दीनेश थापा मगरको कमजोरीको फाइदा उठाउँदै टिसी स्पोर्टसले खेलको अन्त्यतिर अग्रता लिएको थियो । ८३ औं मिनेटमा मैदानको दायाँबाट टिसी स्पोर्टस्का खेलाडीले क्रस गरेको बल दीनेशले हातमा परिसकेपछि पनि राम्ररी नियन्त्रणमा लिन सकेनन् । त्यसको फाइदा उठाउँदै नाफिउ अली सहजै गोल गरे । त्यहि गोल खेलको निर्णायक बन्यो र मनाङ प्रतियोगिताबाट बाहिरियो । मनाङले केही राम्रो मौका पाउँदा पनि सफल हुन सकेन । १७ औं मिनेटमा रोहित चन्दको क्रसमा सुजल श्रेष्ठले फिल्क गरेको बल ओलाडिपो ओलावाले अफिजले प्रहार गर्दा पोस्ट नजिकबाट बाहिरिएको थियो ।

त्यस्तै ५५ औं मिनेटमा कमल श्रेष्ठको क्रसमा रोहितको हेडर किरणले पन्च गर्दै टोलीको संकट टारेका थिए । इन्जुरी समयमा कमलको फ्रिकिकमा सिसोकोको हेडर फ्लिक्लाई नजिकबाट आफिजले गरेको प्रहार किरणले रोकेका थिए । हेड टु हेडका आधारमा मोहमडन स्पोर्टिङ क्लबलाई पछि पार्दै मनाङ समूह बीको उपविजेताका रुपमा अन्तिम चार पुगेको थियो ।टिसी स्पोर्टस समूह एको विजेताका रुपमा अघि बढेको थियो । अर्को सेमिफाइनल मंगलबार आयोजक चितोगोङ अवहानी र कोरियाली क्लबबीच हुनेछ । टिसी स्पोर्टस्सङ पहिलो सिजन खेल्दै गरेका किरण खेलको म्यान अफ द म्याच भए ।