काठमाडौं (हाम्रो खेलकुद)- अखिल नेपाल फुटबल संघ (एन्फा) ले ए डिभिजन क्लबको लागि लिग कम नकआउट प्रतियोगिता गर्ने भएको छ।

एएफसी क्लब च्याम्पियनसिपमा नेपालको टोली पठाउनको लागि यो प्रतियोगिता गर्न लागेको हो। नियम अनुसार एएफसीको यो प्रतियोगितामा लिग विजेता टोली भाग लिनुपर्ने हो।

तर एन्फाले सहिद स्मारक ए डिभिजन लिग सञ्चालन गर्न सकेन । जसको कारण यो प्रतियोगिता गर्न लागेको हो।

आज एन्फामा भएको बैठकमा एन्फा पदाधिकारी र ए डिभिजनका १४ क्लबबीच प्रतियोगिताका लागि सहमति भएको बताइएको छ। प्रतियोगिता वैशाख २० गतेदेखि हुने तय भएको छ।

पछिल्लो पटक लिगमा १४ टोली खेलेका थिए। खुमलटार र एपिएफ रेलिगेसनमा परेको थियो। थ्री स्टार क्लबले श्रम स्वीकृति नभएका खेलाडी खेलाएको भन्दै एपिएफले उजुरी दिएको थियो। त्यसमा एन्फाले अहिले सम्म कुनै निर्णय गरेको छैन।

प्रतियोगिताको लागि यही वैशाख १० गतेभित्र टिम दर्ता गर्नुपर्ने र बैशाख १५ गतेभित्र न्यूनतम खेलाडी दर्ता गरिसक्नुपर्ने सहमति पनि भएको छ।

यो प्रतियोगिताको विजेताले एएफसी क्लब च्याम्पियनसिपमा नेपालको प्रतिनिधित्व गर्ने मौका पाउनेछ। गत संस्करण भने चर्च ब्वाइज युनाइटेडले एएफसी क्लब च्याम्पियनसिपमा नेपालको प्रतिनिधित्व गरेको थियो।

चर्च ब्वाइजले २०८० जेठमा ४४ औं संस्करणको सहिद स्मारक ए डिभिजन लिगको उपाधि जितेको थियो।