सुबास हुमागाईं, काठमाडौं

नेपाल सुपर लिग (एनएसएल) को खेलाडी अक्सनमा सहभागी टिमहरुले गोलरक्षक अनुबन्धनमा खासै इच्छा देखाएनन् । यहाँसम्मकी अक्सन हुने समयमा राष्ट्रिय टोलीमा रहेका तीनै गोलरक्षक एक समय अनसोल्ड समेत रहे । तर एनएसएलको सुरुवाती ६ खेल हेर्दा विदेशी गोलरक्षक खेलाउने टोलीको निर्णयले टोलीलाई खासै फाइदा गरेको देखिदैन । बरु अवसर पाएका नेपाली गोलरक्षकले भने प्रमाणित गर्दै अन्य टोलीलाई पनि सोच्न बाध्य बनाएका छन् ।

एनएसएल सुरु हुनुअघि राष्ट्रिय टोलीका कप्तान किरण चेम्जोङ कुनै टोलीमा आवद्ध नहुने कुराले फुटबल वृत्त नै तरंगित थियो । किरणको मागअनुसार सहभागी टोली अनुबन्ध गर्न राजी नभएको र किरण आफैं अहिले विदेशी लिग खेल्ने प्रक्रियामा रहेको खेलाडी स्वयंको भनाइ थियो । तर दीप कार्की दोस्रो चरणमा मात्र बिक्नु तथा विकेश कुथु र विशाल सुनार रोजाइमै नपर्नुले पनि क्लबहरुले विदेशी गोलरक्षक अनुबन्ध गर्ने आँकलन गर्न सकिन्थ्यो ।

यतिमात्र एफसी चितवनले त ए श्रेणीमा रिटेन गरेका आफ्ना कप्तान विशाल श्रेष्ठ हुँदाहुँदै विदेशी गोलरक्षक अनुबन्ध गरेर सबैलाई चकित पारेको थियो । यता अक्सन र ड्राफ्ट गरेर नेपालकै दुई गोलरक्षक अनुबन्ध गरेको धनगढीले पनि विदेशी गोलरक्षक नै रोज्यो ।

लिग सुरु हुँदा बुटवल लुम्बिनीले मात्र विदेशी गोलरक्षक अनुबन्ध गरेको थिएन । दीप कार्कीमा विश्वास गरेको टोलीले त्यसको प्रतिफल पनि पायो । आफ्नो पहिलो खेलमा १० खेलाडीमा सिमित भएपनि बुटवललाई गोलरहित बराबरीमा राख्न दीपले महत्त्वपूर्ण भूमिका खेल्दै प्लेयर अफ द म्याच चुनिए ।

त्यसअघि काठमाडौंले पनि राष्ट्रिय टोलीमा स्थान बनाइसकेका अभिषेक बरालमा विश्वास गर्यो । विदेशी गोलरक्षक सेनेगलका चेइख गेये टोलीमा रहेपनि प्याट्रिक डे वाइल्डले गोलरक्षक भन्दापनि आउटफिल्डमै ५ विदेशी खेलाडी उतारे । त्यसले टोलीलाई सहज पनि भयो । अभिषेककै प्रदर्शनमा काठमाडौंले दोस्रो खेलमा झापालाई गोलरहित बराबरीमा रोक्यो । उनी प्लेयर अफ द म्याच नै चुनिए ।

त्यसो त पोखराले ललितपुर सिटीविरुद्ध खेलमा ३ गोल खाएपछि विदेशी गोलरक्षक प्रिसोको स्थानमा कृषल मोक्तानलाई मैदान छिरायो । एक त प्रिसोको खस्केको प्रदर्शन र अर्कोतर्फ पाँचौ विदेशी आउटफिल्डमा खेलाउदा हुने प्रभावले पोखराले यो निर्णय लिएको थियो ।

झापाले पनि काठमाडौंविरुद्ध खेलको अन्तिम मिनेटमा आफ्नो मुख्य गोलरक्षक मोन्टेनेन्ग्रोका नेमान्या लेमाजिच घाइते भएपछि एन्जल श्रेष्ठलाई मैदान छिरायो । लिग अघि बढ्दै जाँदा टिमहरुले यस्तो निर्णय अझै लिने सम्भावना देखिन्छ ।

लिगको ६ खेल सम्पन्न हुँदा ४ खेलमा विदेशी खेलाडी र २ खेलमा मात्र नेपाली खेलाडीले प्लेयर अफ द म्याच पाएका छन् । प्लेयर अफ द म्याच हुने दुवै नेपाली खेलाडी गोलरक्षक हुन् भने विदेशीमा सबै ४ जना मिडफिल्डर नै रहेका छन् ।

चितवनले पछिल्लो खेलमा नाइजेरियन फरवार्ड युसुफ मलिकलाई अन्तिम समयतिर मैदान प्रवेश गराएको थियो । उक्त खेलमा चितवनका दुवै विंगरले पूरा समय खेल्न सकेनन् । चितवनले मलिकलाई खेलाउने निर्णय लिन्छ भने विशालले सुरुवात गर्ने सम्भावना छ । उनी पछिल्लो समय उच्च लयमा रहेकाले पनि प्रशिक्षक नविन न्यौपानेले यो निर्णय लिन सक्छन् ।

यता धनगढीका लागि पनि नाइजेरियन ओलावाले अफिज पहिलो खेलमा बेन्चमै रहे । प्रशिक्षक मार्टिनज साएजले आक्रमण बलियो बनाउने विकल्प रोज्दा जियारत र सन्तोषले स्पेनी गोलरक्षक वालिद एसाफीको स्थान लिन सक्छन् ।

ललितपुर सिटीमा गत सिजन जेफ्री बाल्टसले गोल्डेन ग्लोभ जितेका थिए । यसपटक उनले दुवै खेलमा २-२ गोल खाएका छन् । ललितपुरले आक्रमणमा पापा केबे र बेलफर्ट दुवैलाई खेलाउन चाहेको अवस्थामा बेन्चमा रहेका गोलरक्षक समित श्रेष्ठ मैदानमा उत्रने सम्भावना छ । समितले गत सिजन इलामबाट एनएसएल खेलिसकेका छन् ।

विदेशी खेलाडीको प्रभाव गोलरक्षण भन्दापनि आउटफिल्डमा धेरै देखिएको छ । विश्वास गरेका नेपाली गोलरक्षकको प्रदर्शन लिगमा राम्रो भएको उदाहरणले अन्य टोली पनि अब बिस्तारै त्यस रणनीतिमा अघि बढ्ने देखिन्छ । अक्सनमा उपेक्षित भएपछि अधिकांश गोलरक्षकको मनोबल केही घटेपनि पाएको अवसरको सदुपयोग गरेपछि अहिले टोलीहरु खेलाडी अनुबन्धनमा चुकेको हो कि भन्ने प्रश्न पनि उठेको छ ।