दिपक न्यौपाने
बुटबल – दुई ए डिभिजन टोली सिएमजी क्लब संकटा र नेपाल एपिएफ क्लब ठिक एक सातापछि फेरी एकपटक आमनेसामने हुँदैछन् । देविनगरस्थित एन्फा टेक्निकल सेन्टरमा जारी १९ औं तिलोत्तमा गोल्डकप फुटबल प्रतियोगिताको तेस्रो क्वार्टरफाइनलमा सोमबार यी दुई टोलीबीच भेट हुँदैछ ।

फाइल फोटो

अघिल्लो सोमबार पनि यी दुई टोलीबीच १९ औं बुढासुब्बा रेडबुल गोल्ड कप फुटबल प्रतियोगिताको क्वार्टरफाइनलमै भेट भएको थियो । त्यहाँ संकटाले एपिएफलाई १–० ले हराएको थियो । संकटा बुढासुब्बाको फाइनलमा सडन डेथमा पुगेर नेपाल पुलिस क्लबसँग पराजित भएको थियो ।

पुसमा पूर्वाञ्चलमा भएको सातौं राष्ट्रिय खेलकुदको फुटबलमा स्वर्ण पदक जितेयता एपिएफले लगातार आठ खेल हारेको थियो । सबै खेलमा टोली पहिलो खेलबाट पराजित भएको थियो । बुटवल आइपुगेर भने एपिएफको हारको सिलसिला टुंगिएको थियो । एपिएफले भारत कालिङपोङको सेरे एफसीलाई १–० ले हराउँदै अघि बढेको थियो ।

आयोजक अग्नी रुपन्देही ११ र हिमालयन शेर्पा क्लब यसअघि नै तिलोत्तमा गोल्ड कपको सेमिफाइनल पुगिसकेका छन् । रुपन्देही जिल्ला फुटबल संघको आयोजनामा सञ्चालित मोफसलकै प्रतिष्ठित गोल्डकप मध्येको एक तिलोत्तमा २०३३ सालबाट सुरु भएपनि पटक पटक आर्थिक अभाव र अन्य कारणले रोकिने गर्थ्यो । गत बर्ष भने प्रतियोगिताले पुनः निरन्तरता पाएको छ ।

यसपटक प्रतियोगितालाई अग्नी सिमेन्टले मुख्य प्रायोजन गरेको छ । बुटवल उप महानगरपालिकाको संरक्षणमा संचालन हुने प्रतियोगितालाई करेन्ट मसला र हुवाइ मोबाइल सहयोग प्रायोजन गरेका छन् । त्यस्तै एन्फा, राष्ट्रिय खेलकुद परिषद (राखेप) र रुपन्देही जिल्ला विकास समिति प्रतियोगिताको विशेष सहयोगीका रुपमा रहेका छन् । तिलोत्तमा गोल्डकपको विजेता टोलीले उपाधिसहित ५ लाख ५५ हजार ५ सय ५५ रुपैयाँ प्राप्त गर्नेछ ।