सरिता श्रेष्ठ, काठमाडौं

एनसेल नेपाल सुपर लिग (एनएसएल ) तेस्रो सिजनको आज तेस्रो दिन । पोखरा थन्डर्स र एफसी चितवन बीचको खेलको लागि ग्राउन्ड रिपोर्टिङ समयमा नै दुवै टोली दशरथ रंगशाला पुगे । दुवै टोलीले वार्मअप पनि गरे । खेल तालिका अनुसार साँझ ६ बजे खेल किकअफ हुने समय हो । यसको लागि सामान्यतया ७-८ मिनेटअघि दुवै टोलीका खेलाडी मैदान प्रवेश गर्नुपर्ने हो । तर आज त्यसो भएन ।

खेल हेर्न पुगेका दर्शक, ब्रोडकास्ट टिम, टेक्निकल टिम लगायत खेल सञ्चालनमा हुनुपर्ने सबै प्राविधिक पक्ष तयारी अवस्थामा थिए। तर खेल्ने टोली मैदान प्रवेश गर्न तयार थिएन । चितवनका खेलाडी लाइनअप गर्न टनेलमा थिए तर पोखराका खेलाडी त्यहाँ गएनन्।

पोखराले चितवनका विदेशी खेलाडीको श्रम स्वीकृती माग गरेको थियो । यही कारण दुवै टोलीको व्यवस्थापनबीच चर्काचर्की समेत परेको थियो । विवाद लामै चल्यो । अन्तत: निर्धारित समयभन्दा १८ मिनेट ढिला गरी खेल सुरु भयो । चितवनका ५ विदेशी खेलाडी स्टार्टिङ लाइनअपमा नै थिए । उनीहरूको श्रम स्वीकृतिको कागजात आइसकेको थिएन ।

यही विषयलाई मुद्दा बनाएको पोखराले पनि श्रम स्वीकृति नभएका विदेशी खेलाडी स्टेफन बिनोङलाई दोस्रो हाफमा मैदानमा उतार्यो । बिनोङले सुरुवातमा वार्म अप पनि गरेका थिएनन् । उनी अन्य खेलाडीले वार्मअप गर्दा दर्शकदीर्घामा नै थिए । अधिकारिक लाइनअप सूचीमा उनको नाम वैकल्पिक खेलाडीमा भने थियो । पहिलो हाफमा १-० ले पछि परेको पोखराले उनलाई दोस्रो हाफमा मैदानमा छिरायो । उनले दोस्रो हाफ पुरै खेले । तर खेल चितवनले २-० ले जित्यो ।

चितवनले श्रम स्वीकृतिको सबै प्रक्रिया गरेको, पैसा पनि तिरेको र आज बिहान कागजात आउने निश्चित भएको बतायो । तर इदको कारण नेपाल सरकारबाट आइतवार साँझ सोमवारको दिन सार्वजनिक बिदा दिने घोषणा भएपछि कागजात नआएको चितवनले जानकारी दियो । युवा तथा खेलकुद मन्त्रालय र राष्ट्रिय खेलकुद परिषदबाट भने पत्र ल्याएको र आयोजकलाई बुझाएको चितवनको भनाई छ ।

साथै यस विषयमा आयोजक नेपाल स्पोर्टस एण्ड इभेन्ट म्यानेजमेन्टका प्रबन्ध निर्देशक श्रेयान्स कार्कीलाई यो विषयमा जानकारी गराएको र उनले हुन्छ भनेको तर्क चितवनले राखेको छ ।

यता पोखराले भने चितवनले श्रम‌ स्वीकृती नभएका ५ विदेशी खेलाडीलाई खेलाएपछि आफुहरूले पनि बिनोङलाई उतारेको प्रशिक्षक सुमन श्रेष्ठले बताए । उनले प्रोटेस्टको नियम नभएको भन्ने खबरपछि बिनोङलाई खेलाएको बताए । तर प्रतियोगिताको नियमवालीमा भने प्रोटस्ट गर्न पाउने स्पष्ट रुपमा उल्लेख गरिएको छ ।

नियमावलीलाई आधार मान्ने हो भने श्रम स्वीकृति अनिवार्य छ । तर आज दशरथ रंगशालामा ६ विदेशी खेलाडी श्रम स्वीकृति बिना खेले । त्यसो त विदेशी खेलाडीको कागजी प्रक्रियालाई लिएर विवाद भएको यो पहिलो घटना होइन । यसअघि ए डिभिजन लिगका दौरान थ्री स्टार क्लबले भिसा अवधि सकिएका खेलाडी खेलाएको भन्दै एपिएफ फुटबल क्लबले दायर गरेको प्रोटेस्ट अझै अनिर्णित नै छ ।

एनएसएलको यो घटनाले आयोजक आफैंले तयार पारेको नियमावलीको धज्जी मात्र उडेन, लिगको स्तरमाथी नै प्रश्न खडा भएको छ । यो प्रश्न पोखराका प्रशिक्षक सुमन श्रेष्ठ र चितवनका प्रशिक्षक नविन न्यौपाने दुवैले उठाए ।

खेल सुरु हुन ढिलाइ भएपनि खेलको प्रत्यक्ष प्रसारण गर्दै आएको हिमालयन टिभीमा कुनै जानकारी थिएन । ६ बजे किकअफ हुनुपर्ने खेलका लागि सामान्यतया ७-८ मिनेटअघि प्रसारण सुरु हुने भएपनि ६ बजेर १० मिनेटसम्म पनि टिभीमा विज्ञापन नै बजीरह्यो । मैदानको अवस्थाबारे प्रसारणमा कुनै जानकारी आएन ।

प्रसारण सुरु भएको केही समयपछि मात्र खेलाडी मैदान छिरे । तर यसबीचमा कमेन्टेटरले खेलको अवस्थाबारे कुनै जानकारी दिएनन् । आयोजक वा टिमको कमजोरीबारे खेल अवधिभर कुनै चर्चा नै भएन । यसले एनएसएलको आयोजक समितिको प्रभाव प्रत्यक्ष प्रसारणमा रहेको प्रश्न पनि उठेको छ ।

नियम नै फुटबलको मुख्य आधार हो । तेस्रो खेलमा नियम तोडिएको छ, त्यो पनि दुवै टोलीबाट । अब एनएसएलको नियमअनुसार जाने हो भने दुवै टोलीलाई कारवाही हुन सक्छ । तर जुन हिसाबमा सोमवार निर्णय भयो, पुन: एकपटक एनएसएलले आफ्नो नियम तोड्ने सम्भावना प्रबल छ । तर यसको जवाफ आयोजकले दिनुपर्छ । प्राविधिक रूपमा जोडिएको अखिल नेपाल फुटबल संघ (एन्फा) ले पनि यस विषयलाई गम्भीर रुपमा लिनुपर्छ ।

खेलपछि बोल्दै पोखरा थन्डर्सका प्रशिक्षक सुमन श्रेष्ठ:

खेलपछि बोल्दै एफसी चितवन प्रशिक्षक नविन न्यौपाने :