सुमन अधिकारी, बुटवल

मच्छिन्द्र एफसी रुपन्देहीमा जारी २३ औं तिलोत्तमा गोल्ड कप फुटबल प्रतियोगिताको सेमिफाइनल पुगेको छ।

भारतको अडोर्न गडवा स्पोर्टिङ क्लबलाई आज १-० ले हराउँदै मच्छिन्द्र अन्तिम चारमा पुगेको हो । योसँगै प्रतियोगिताको सेमिफाइनल समीकरण पूरा भएको छ।

देविनगरस्थित एन्फा टेक्निकल खेलमैदानमा भएको रोमान्चक खेलमा मच्छिन्द्रको जितमा राजिव लोक्चन एकमात्र गोले गरेका हुन । पहिलो हाफ गोलरहित बराबरीमा सकिएको थियो ।

खेलको ९० औं मिनेटमा राजीव लोप्चनले विजयी गोल गरेका हुन् । इन्ज्युरी समयमा विमल घर्तीमगरले गोल अन्तरले दोब्बर पार्ने मौका गुमाएका थिए ।

मच्छिन्द्रका राजीव प्लेयर अफ दी म्याच घोषित भए र उनले ११ हजार १ सय ११ रुपैयाँ प्राप्त गरे।

मच्छिन्द्र अब सेमीफाइनलमा सहिद स्मारक ए डिभिजन लिग विजेता चर्च ब्याइज युनाइटेको सामना गर्नेछ।
बुधवार एपिएफ र संकटाबीच पहिलो सेमिफाइनलमा हुनेछ।

रुपन्देही जिल्ला फुटबल संघको आयोजना बुटवल उपमहानगरपालिकाको संरक्षक रहेको प्रतियोगितालाई यशोदा फुड्स प्रालि र त्रिमुर्ति इण्डस्ट्रिज प्रालिले मुख्य प्रायोजन गरेको छ।

प्रतियोगिताको विजेता टोलीले ट्रफीसहित १२ लाख १२ हजार २ सय २२ रुपैयाँ र दोस्रो टोलीले ६ लाख ६६ हजार ६ सय ६६ रुपैंयाँ प्राप्त गर्नेछ।