सुशील पन्त क्षेत्री, चितवन

एपिएफ एससीले चितवनमा राष्ट्रिय महिला फुटबल प्रतियोगिताको उपाधि जितेको छ ।

भरतपुरको कृष्णपुरको मैदानमा भएको फाइनलमा त्रिभुवन आर्मी फुटबल क्लबलाई टाइब्रेकरमा ४-२ ले हराउँदै एपिएफ च्याम्पियन बनेको हो ।

निर्धारित ८० मिनेटको खेल १-१ को बराबरीमा टुंगिएपछि खेलको निर्णय टाइब्रेकरमा भएको थियो।

प्रतिस्पर्धात्मक खेलमा एपिएफले उत्कृष्ट पुनरागमन जित निकाल्यो । खेलमा अग्रता भने आर्मीले लिएको थियो । १३ औं मिनेटमा विमला चौधरीको गोलमा आर्मीले अग्रता लियो । अग्रता जोगाउन नसकेको आर्मीले उपाधि गुमायो ।

अन्तिम ६ मिनेट सम्हालिन नसक्दा आर्मी स्तब्ध भयो । ७४ औं मिनेटमा रश्मिकुमारी घिसिङले सुन्दर हेडर गोल गर्दै एपिएफलाई खेलमा फर्काइन् । एपिएफकी प्रीति राई प्लेयर दि फाइनल घोषित भइन् । उनले १० हजार रुपैयाँ प्राप्त गरिन् ।

एपिएफले ट्रफीसहित ३ लाख र आर्मीले १ लाख ५० हजार रुपैयाँ प्राप्त गर्यो। एपिएफले यो वर्ष लिग सहित ३ वटा उपाधि जितेको छ ।

एन्फा महिला लिगको फाइनलमा नेपाल पुलिस क्लबलाई हराएको एपिएफले दुई वटा नकआउट फुटबल प्रतियोगिताको फाइनलमा आर्मीलाई पराजित गर्यो। फागुन २४ गते इलाम गोल्डकपको फाइनलमा पनि आर्मी एपिएफसँग पराजित भएको थियो।

चितवनमा आर्मीकी चन्द्रा भण्डारी प्रतियोगिताको सर्वोत्कृष्ट खेलाडी घोषित भइन्। उनले ४० हजार प्राप्त गरिन् ।

एपिएफकी सावित्री किसन उत्कृष्ट गोल रक्षक, आर्मीकी विमला बिक उत्कृष्ट डिफेन्डर, एपिएफकी रेनुका नगरकोटे उत्कृष्ट मिडफिल्डर, एपिएफका जीवेश पाण्डे उत्कृष्ट प्रशिक्षक घोषित भए ।

८ गोलसहित एपिएफकी रश्मि कुमारी घिसिङ सर्वाधिक गोलकर्ता रहिन् । उनीहरुले जनही २० हजार रुपैयाँ प्राप्त गरे ।

चितवन जिल्ला फुटबल संघको आयोजना तथा भरतपुर महानगरपालिकालो प्रवर्द्धनमा भएको प्रतियोगितामा ८ टोली सहभागी थिए ।