सुमन अधिकारी, बुटवल

बुटवलमा २३ औं तिलोत्तमा गोल्ड कप नकआउट फुटबल प्रतियोगितामा शनिवार सुरु भएको छ ।

उद्घाटन खेलको पहिलो हाफमा आयोजक करेन्ट रुपन्देही ११ विरुद्ध एपिएफ एफसीले १- ० गोलको अग्रता लिएको थियो । प्रतिस्प्रर्धात्मक खेलको १७ औ मिनेटमा हरि कार्कीले गोल गर्दै एपिएफलाई अग्रता दिलाएका हुन् ।

दोस्रो हाफ सुरु भएसको केहि समयमा नै हावाहुरी चलेपछि खेल रोकियो । लामो समयसम्म मौसम प्रतिकुल भएपछि खेल स्थगित गर्ने निर्णय भएको रुपन्देही जिल्ला फुटबल संघका अध्यक्ष लोक पुनले बताए । ‘ स्थगित खेल भोलि बिहान ८ बजे हुनेछ,’ उनले भने ।

खेल तालिका अनुसार भोलि चर्च ब्याइज युनाइटेड नेपाल पुलिस क्लब बिच खेल हुनेछ ।

यसअघि प्रतियोगिताको उद्घघाटन गर्दै बुटवल उपमहानगरपालिकाका नगरप्रमुख खेलराज पाण्डेले नगरभित्र खेलकुद विकास र युवा खेलाडी उत्पादन गर्ने गरि सरकारको खेल क्षेत्रमा लगानी गरेको बताए ।

अखिल नेपाल फुटबल संघका निवर्तमान अध्यक्ष कर्मा छिरिङ शेर्पाले तिलोत्तमा गोल्डकपलाई थप परिस्कृत रुपमा लैजान आग्रह गरे । रात्रीकालिन प्रतियोगिता आयोजना हुने गरि फ्लड लाईट जडान जरुरी रहेको भन्दै उनले बताए ।

यो वर्ष पुरस्कार राशीमा समेत अघिल्लो संस्करणभन्दा १ लाख रुपैया बृद्धि गरिएको छ । प्रतियोगिताको विजेता टोलीले १२ लाख १२ हजार २ सय २२ रुपैयाँ र दोस्रो टोलीले ६ लाख, ६६ हजार, ६ सय, ६६ रुपैयाँ प्राप्त गर्नेछ।

रुपन्देही एन्फाको आयोजना बुटवल उपमहानगरपालिकाको संरक्षक तथा यशोदा फुड्स प्रालि र त्रिमुर्ति ईण्डस्ट्रिज प्रालिको मुख्य प्रायोजन रहेको प्रतियोगिता प्रदेश खेलकुद परिषद लुम्बिनी मुख्य सहयोगी‌ रहेको‌ छ।

प्रतियोगितामा संकटा एफसी, मच्छिन्द्र एफसी, एडोर्न गडवाल स्पोर्टिङ क्लब, जर्जियन एफसीको पनि सहभागिता रहेको छ।