चितगोङ (हाम्रो खेलकुद) – शेख कमल अन्तर्राष्ट्रिय क्लब कपको सोमबार सेमिफाइलन सुरु हुँदा लक्ष्मी हुन्डाई मनाङ मस्र्याङ्दी क्लबले माल्दिभ्सको क्लब टिसी स्पोर्टसको सामना गर्नेछ । टिसी स्पोर्टस् त्यहि क्लब हो जसको गोलपोस्ट मनाङका पूर्व खेलाडी एवंम् राष्ट्रिय फुटबल टोलीका गोलकिपर किरण चेम्जोङले सम्हाल्ने छन् ।

मनाङ समूह ‘बी’ को उपविजेता र किरणको टिसी स्पोर्टस समूह ‘ए’ को विजेताका रुपमा एकअर्कासँगको भेट पक्का गरेका थिए । यी दुईबीचको खेल नेपाली समय अनुसार चितगोङस्थित मोहम्मद अजिज रंगशालामा साँझ ६ः१५ मा सुरु हुनेछ ।

सेमिफाइनलको अघिल्लो दिन आइतबार चिगोङमा भएको प्री म्याच कन्फ्रेन्समा मनाङका मुख्य प्रशिक्षक छिरिङ लोप्साङ गुरुङले आफ्नो टोली सेमिफाइनलका लागि तयार रहेको बताएका छन् । उनले भने ‘ टिसी स्पोर्टस्मा केही विदेशी खेलाडीको साथले राम्रो छ । सेमिफाइनल प्रतिस्पर्धात्मक हुनेछ । हामी पनि कमजोर छैनौं त्यसैले हामी जित्ने लक्ष्य मैदान उत्रनेछौं ।’

उनले थपे ‘शारीरिक र मानसिक रुपमा टिसीविरुद्ध खेल्न तयार छ । हामी नियमित समयमै नतिजा आफ्नो पक्षमा निकाल्ने लक्ष्यका साथ ओर्लने छौं । मनाङका कप्तान अनिल गुरुङले मिहेनत गरेर खेले टिसी स्पोर्टस्लाई हराउने क्षमता आफ्नो टोलीमा रहेको बताए ।

‘टिसी स्पोटस् राम्रो टिम हो । सेमिफाइनल प्रतिस्पर्धात्मक हुनेछ,’ उनले भने, ‘ यसपटक मनाङको टिमवर्क राम्रो छ त्यसैले जित्न सक्ने क्षमता हामीमा छ । ८ जना राष्ट्रिय खेलाडी, ३ विदेशी र युवा खेलाडीको समिश्रण छ । ’
टिसी स्पोर्टस्का प्रशिक्षक निजम मोहम्मदले मनाङलाई सहजै हराउने आशा व्यक्त गरे । उनले भने, ‘ मनाङ र हाम्रो खेल स्तर समान भएपनि हामी जित्नेछौं ।’

हेड टु हेडमा मोहमोदेन स्पोर्टिङ क्लबलाई पछि पार्दै मनाङ समूह बीको उपविजेताका रुपमा अघि बढेको थियो । समूह चरणको पहिलो खेलमा मोहमोदेनलाई २–० ले हराएको मनाङ अर्को खेलमा अफगानिस्तानको शाहिन आस्मायीसँग ३–१ ले पराजित भएको थियो । समूह चरणको अन्तिम खेलमा मनाङ आयोजक चितगोङ अवहनी लिमिटेडसँग २–२ गोलको रोकिएको थियो । पहिलो खेलको जितका कारण हेड टु हेडमा मोहमडनलाई पछि पार्दैै मनाङ अघि बडेको थियो ।

अर्को समूहमा टिसी स्पोर्टस्ले पहिलो खेलमा ढाका अवहनी लिमिटेडलाई १–० र अर्को खेलमा कीर्गिस्तानको एफसी आल्गालाई २–१ ले हराएको थियो । समूह चरणको अन्तिम खेलमा भने टिसी स्पोर्टस् पोइचेन सिटीजन एफसीसँग १–१ बराबरीमा रोकिएको थियो ।

दोस्रो सेमिफाइनल मंगलबार समूह ‘बी’ को विजेता चितगोङ र समूह ‘ए’ को उपविजेता दक्षिण कोरियाको पोइचेन सिटीजन एफसीबीच हुनेछ । फाइनल मार्च ३ मा हुनेछ । प्रतियोगिताको विजेताले ३० हजार र दोस्रो हुने टोलीले १५ हजार अमेरिकी डलर प्राप्त गर्नेछन् ।